ჩვენ ვართ იმ ქვეყნების პირველ ათეულში, ვინც კორონავირუსის საწინააღმდეგო აბებს მიიღებს - თენგიზ ცერცვაძე
ინფექციური საავადმყოფოს ხელმძღვანელის, თენგიზ ცერცვაძის თქმით, Merck-ის და Pfizer-ის მიერ წარმოებულმა კორონავირუსის საწინააღმდეგო აბებმა აშშ-ის წამლისა და საკვების ადმინისტრაციის (FDA) რეკომენდაცია მიიღეს.
მისი თქმით, "Pfizer-ის მიერ წარმოებული „პაქსლოვიდი“ 89%-ით ამცირებს ჰოსპიტალიზაციას და სიკვდილობას, თუ პირველივე დღეებში მივცემთ მას პაციენტს, ხოლო Merck-ის პრეპარატი „მოლნუპირავირი“ - 30%-ით, მაგრამ ესეც კარგია".
„გარკვეულწილად ეს კონფიდენციალური ინფორმაციაა, მაგრამ მინდა გითხრათ, რომ ჯანდაცვის სამინისტრომ ამ მედიკამენტებზე მოლაპარაკებები დაიწყო ჯერ კიდევ მაშინ, როცა მათი არსებობის შესახებ ძალიან ვიწრო წრემ იცოდა. მოხდა ისე, რომ ჩვენ სხვადასხვა არხით გავიგეთ, რომ ამ მედიკამენტზე მუშაობა საწყის ეტაპებზე იყო. ამიტომ თუ ვაქცინების მიღებისას საქართველო გრძელ რიგში იდგა და ბოლოს მივიღეთ ვაქცინები, ახლა ვართ ქვეყნების პირველ ათეულში, ვინც ამ პრეპარატს მიიღებს“, - განაცხადა ცერცვაძემ "იმედის" ეთერში.
