ელექტროენერგიის ტარიფის ნაზარდს 1 მილიონ ადამიანს დავუსუბსიდირებთ - პრემიერი
საქართველოს პრემიერ-მინისტრის, ირაკლი ღარიბაშვილის თქმით, ხელისუფლება მილიონ ადამიანს ელექტროენერგიის ნაზარდს დაუსუბსიდირებს.
ამის შესახებ ღარიბაშვილმა მთავრობის სხდომაზე განაცხადა.
„ჩვენი გადაწყვეტილებით, მოსახლეობის მნიშვნელოვან ნაწილს, დაახლოებით 1 მილიონ ადამიანს დავუსუბსიდირებთ ელექტროენერგიის ტარიფის ნაზარდს. ეს შეეხება კერძოდ მიზნობრივ ჯგუფებს, 150 000 და ნაკლები ქულის მქონე მოსახლეობას, რაც დაახლოებით, როგორც ვთქვი, 1 მილიონ ადამიანს შეადგენს.
ჩვენ აღნიშნული პროგრამა გვქონდა პანდემიის დაწყების დღიდან, 2 წელი გრძელდებოდა, ახლა იანვარში შეწყდა სუბსიდირების პროგრამა და ამიტომ, გადაწყვეტილება მივიღეთ, რომ ეს პროგრამა გავაგრძელოთ. მოსახლეობის ის ფენა, რომელიც ყველაზე მეტად გაჭირვებულია დავუსუბსიდიროთ ელექტროენერგიის ნაზარდი. ეს ამოქმედდება იანვრიდან მთელი წლის განმავლობაში“, - განაცხადა ირაკლი ღარიბაშვილმა.
