იანვარში ბოსტნეული 23.3 პროცენტით, ხოლო პური 20.5 პროცენტით გაძვირდა - საქსტატი

საქსტატის მიერ დღეს გამოქვეყნებული ანგარიშის მიხედვით, ოქტომბერში წლიურმა ინფლაციამ 13.9 პროცენტი შეადგინა. როგორც სტატისტიკის ეროვნული სამსახურის ანგარიშიდან ირკვევა, წლიურ ჭრილში ინფლაციის ფორმირებაზე ძირითადი გავლენა იქონია ფასების ცვლილებამ საცხოვრებლის, წყლის, ელექტროენერგიისა და აირის ჯგუფზე.

საქსტატის მონაცემებით, ჯგუფში დაფიქსირდა ფასების 44.8 პროცენტიანი მატება, რაც 3.69 პროცენტული პუნქტით აისახა წლიურ ინფლაციაზე. ყველაზე მეტად, 68 პროცენტით ფასები გაიზარდა ელექტროენერგიაზე, აირსა და სათბობის სხვა სახეებზე.

წყალმომარაგება და საცხოვრებელთან დაკავშირებული სხვა მომსახურება 58.0 პროცენტით გაძვირდა. ფასების ზრდის ტენდენცია ნარჩუნებოდა იანვარშიც სურსათსა და უალკოჰოლო სასმელებზე. ჯგუფში ფასები გაიზარდა 16.2 პროცენტით, რაც წლიურ ინფლაციაზე 5.27 პროცენტული პუნქტით აისახა. ბოსტნეული და ბაღჩეული 23.3 პროცენტით გაძვირდა, პური და პურპროდუქტები – 20.5 პროცენტით, ზეთი და ცხიმი – 19.6 პროცენტით, მინერალური და წყაროს წყალი, უალკოჰოლო სასმელები და ნატურალური წვენები – 18.3 პროცენტით, შაქარი, ჯემი და სხვა ტკბილეული – 18.2 პროცენტით, თევზეული – 16.6 პროცენტით.

ფასებმა 14.4 პროცენტით მოიმატა რძეზე, ყველსა და კვერცხზე. ხილი და ყურძენი 13.7 პროცენტით გაძვირდა, ხოლო ხორცი და ხორცის პროდუქტები – 11.9 პროცენტით. ფასები გაიზარდა 16.2 პროცენტით ტრანსპორტის ჯგუფშიც, რაც 2.08 პროცენტული პუნქტით აისახა მთლიანი ინდექსის ზრდაზე.