საჭიროების შემთხვევაში, 5 წუთში გავჩნდებით ნებისმიერ ლოკაციაზე - კოკა მორგოშია
პრორუსული, ძალადობრივი ჯგუფის, “ალტ ინფოს” ლიდერი “ფორტუნასთან” აცხადებს, რომ 20 ივნისს დაანონსებული აქციის პარალელურად კონტრაქციას არ გეგმავს.
როგორც კოკა მორგოშია აცხადებს, პარტია სხვადასხვა ოფისში მზად არის და იმ შემთხვევაში, თუ სახელმწიფო შენობებზე შტურმი, ან პოლიციელებზე თავდასხმა განხორციელდება – გამოვლენ:
“პარალელურად არაფერს არ ვაპირებთ, ჩვენ ზოგადად მობილიზება და ყოველდღიურად შეხვედრები გვაქვს 2 ივლისთან დაკავშირებით, თუმცა, როგორც ვიცით, 2 ივლისამდე ორი პროვოკაციაა დაგეგმილი – ეს არის 20 ივნისს და 24 ივნისს, ერთი არის მოძრაობა “სირცხვილიას” ორგანიზებული, მეორე, თუ არ ვცდები, “ნაციონალური მოძრაობის” ორგანიზებული.
2 ივლისს იგეგმება გეი-ფესტივალი, მაგას ისინი ეძახიან ღირსების ფესტივალს… არ ჩატარდება ეგ ფესტივალი, არც ერთ შემთხვევაში.
20 ივნისს კი პარლამენტთან შორიახლოს არ გვჭირდება ყოფნა, თბილისი პატარაა, საჭიროების შემთხვევაში, 5 წუთში გავჩნდებით ნებისმიერ ლოკაციაზე. ახლა, თვალით დანახულ ლოკაციაზე არ ვიქნებით იმ მარტივი მიზეზის გამო, რომ შეიძლება მერე რამე პროვოკაცია დაგვაბრალონ, ისედაც ყველაფერს გვაბრალებენ”, – ამბობს მორგოშია.
