უკრაინული არასამთავრობოები ჰააგის სასამართლოს მოუწოდებენ, რეაგირება მოახდინოს გაერო-ს გენერალური მდივნის ვლადიმერ პუტინთან შეხვედრაზე
უკრაინული არასამთავრობო ორგანიზაციები ჰააგის სასამართლოს მოუწოდებენ, რეაგირება მოახდინოს გაერო-ს გენერალური მდივნის, ანტონიუ გუტერეშის რუსეთის პრეზიდენტთან, ვლადიმერ პუტინთან შეხვედრაზე.
არასამთავრობო ორგანიზაციების კოალიცია „უკრაინა, დილის ხუთი საათი“ და არასამთავრობო ორგანიზაცია „სამოქალაქო თავისუფლების ცენტრი“ გამოვიდნენ ღია განცხადებით, სადაც გმობენ გაერო-ს გენერალური მდივნის რუსეთში ვიზიტს.
განცხადების ტექსტი არასამთავრობო ორგანიზაციის, Truth Hounds-ის ვებგვერდზე გამოქვეყნდა, რომელიც მიმართვის ინიციატორი და კოალიციის წევრია.
არასამთავრობო ორგანიზაციებმა აღნიშნეს, რომ პუტინის მიმართ სისხლის სამართლის საერთაშორისო სასამართლოს მიერ გაცემულია დაკავების ორდერი, ამიტომ ასეთი შეხვედრა „ძირს უთხრის ჰააგის სასამართლოს ავტორიტეტსა და იმ ღირებულებებს, რომლებზეც გაერო დგას“.
„ეს ნაბიჯი გამოიყურება, როგორც საერთაშორისო მართლმსაჯულების იგნორირება და ეჭვქვეშ აყენებს გაერო-ს ნეიტრალიტეტს კონფლიქტში. ჩვენ მოვუწოდებთ საერთაშორისო საზოგადოებას, რეაგირება მოახდინოს ამ სიტუაციაზე და მომავალში მსგავსი დარღვევები არ დაუშვას“, – აღნიშნულია განცხადებაში.
საზოგადოებრივი აქტივისტები მიმართავენ რომის სტატუტის წევრ სახელმწიფოთა ასამბლეას და გაერო-ს შესაბამის ორგანოებს, მოახდინონ რეაგირება შექმნილ სიტუაციაზე და მიიღონ ზომები მომავალში მსგავსი ინციდენტების თავიდან ასაცილებლად.
გარდა ამისა, არასამთავრობო ორგანიზაციები სთხოვენ ჰააგის სასამართლოს პროკურორის ოფისს, გაერო-სა და ჰააგის სასამართლოს შორის ურთიერთობების შესახებ ხელშეკრულების მე-18 მუხლის შესაბამისად, მოითხოვონ გუტერეშისგან ნებისმიერი ინფორმაცია, რომელსაც მიიღებს ეჭვმიტანილ პუტინთან შეხვედრისას და შეიძლება სასარგებლო იყოს გამოძიებისთვის.
