"პრაიდის" ოფისში შეჭრაში ბრალდებულები 5000-5000 ლარით დააჯარიმეს
"თბილისი პრაიდის" ცნობით, 5 ივლისს მათ ოფისში შეჭრაში ბრალდებულები სასამართლომ 5 000-5 000 ლარით დააჯარიმა. ინფორმაციას ორგანიზაციის დირექტორი, მარიამ კვარაცხელია ავრცელებს. მისი თქმით, ბრალი 3 პირს ჰქონდა წაყენებული.
მისი განცხადებით, სასამართლომ ვერცერთი მათგანის შემთხვევაში ორგანიზებული დანაშაულის ნიშნები ვერ დაინახა და მათ ბრალი მხოლოდ ბინაში უნებართვოდ შეჭრის მუხლით დაუკვალიფიცირა (სისხლის სამართლის კოდექსის 160-ე მუხლი) ორი დამამძიმებელი გარემოებით, ჯგუფურად და ძალადობის მუქარით. ამასთან, ბრალდება არ შეიცავს სიძულვილით მოტივირებული დანაშაულის კომპონენტს.
კვარაცხელია აღნიშნავს, რომ პრობლემურია ისიც, რომ ბრალი მხოლოდ 3 ადამიანს ჰქონდა წარდგენილი მაშინ, როცა ინციდენტის ამსახველ კადრებში მინიმუმ 10 პირი ჩანდა.
