"მილოცვაა, თუ რაიმე შეფარული წყევლის მაგვარი? რა კარგად "ტენეს" ჯიპები და მიწები საპატრიარქოს" - რას ამბობს პატრიარქის წერილზე ლაშა ბუღაძე?

მწერალმა, ლაშა ბუღაძემ განაცხადა, რომ საქართველოს პატრიარქმა, ილია მეორემ შესაძლოა, მსჯავრდებული პრეზიდენტი, მიხეილ სააკაშვილი დაწყევლა.

“ჭეშმარიტი სხვა რეალობის შესაცნობად ძალა მოიკრიბეო... რომელი რეალობის? ციხის თუ მეტაფიზიკურის? მილოცვაა თუ რაიმე შეფარული წყევლის მაგვარი?.. რა კარგად "ტენეს" ჯიპები და მიწები საპატრიარქოს... აი, "ჭეშმარიტი რეალობის" შედეგიც“, - წერს ლაშა ბუღაძე “ფეისბუქზე“.

ცნობისთვის: მიხეილ სააკაშვილმა საქართველოს კათოლიკოს-პატრიარქს, ილია II-ს დაბადების და აღსაყდრების დღე წერილობით მიულოცა. ექსპრეზიდენტის წერილი საპატრიარქოში ადვოკატმა, შალვა ხაჭაპურიძემ მიიტანა. თავის მხრივ, საპასუხო წერილი მისწერა პატრიარქმა მიხეილ სააკაშვილს. ილია II ექსპრეზიდენტს მოლოცვისთვის მადლობას უხდის და უსურვებს მხნეობას “ჭეშმარიტი სხვა რეალობის შესაცნობად“.„ბატონო მიხეილ, გულითად მადლობას გიხდით აღსაყდრების დღის მოლოცვისთვის. მეც გილოცავთ დაბადების დღეს და დამდეგ შობა-ახალ წელს. გისურვებთ ჯანმრთელობას, მხნეობასა და პირველ რიგში, ღვთის შეწევნას თქვენს სულიერ ძალთა განსამტკიცებლად და ჭეშმარიტი სხვა რეალობის შესაცნობად“, - ნათქვამია პატრიარქის წერილში.