წერეთლის გამზირის რეაბილიტაციის მიზნით გამოცხადებული ტენდერი არ შედგა
თბილისის მერიის მიერ აკაკი წერეთლის გამზირის რეაბილიტაციის მიზნით გამოცხადებული ტენდერი არ შედგა. აღნიშნულის შესახებ სახელმწიფო შესყიდვების სააგენტოს აუქციონის გარეშე გამოცხადებული ტენდერის შედეგებით ირკვევა.
დედაქალაქის მერიამ დიდუბის რაიონში წერეთლის გამზირის სარეაბილიტაციო სამუშაოების ჩატარების მიზნით 3 მონაკვეთზე ტენდერები გასული წლის 16 დეკემბერს გამოაცხადა, წინადადებების მიღება კი მიმდინარე წლის 1 იანვარს დაიწყო და 6 იანვარს უშედეგოდ დასრულდა.
ტენდერის პირობების მიხედვით, წერეთლის გამზირის პირველი - ცაბაძის ქუჩიდან გვეტაძის ქუჩამდე მონაკვეთის შესყიდვის საწყისი ღირებულება 6 075 237 ლარი იყო, მეორე - გვეტაძის ქუჩიდან სამტრედიის ქუჩამდე მონაკვეთის შესყიდვის ფასი 8 592 298 ლარი, ხოლო სამტრედიის ქუჩიდან დიდუბის ხიდამდე მონაკვეთის პროექტირება-მშენებლობის საწყისი ფასი 5 515 779 ლარი იყო.
წყარო: bm.ge
