„ქართველ გოგოს წითელი და მწვანე თმა რატომ უნდა ჰქონდესო“ - კაცმა 16 წლის გოგოები სცემა, მოძალადე დააპატიმრეს

კაცს, რომელმაც 16 წლის გოგოები გარეგნობის გამო სცემა, თავისუფლების აღკვეთა მიუსაჯეს.

კერძოდ, მოსამართლე ნინო სახელაშვილმა 2 წლით და 6 თვით თავისუფლების აღკვეთა მიუსაჯა თეიმურაზ შაინიძეს ქუჩაში 16 წლის გოგოებზე გარეგნობის გამო ფიზიკური ძალადობისთვის.

შემთხვევა ბათუმში გასული წლის ბოლოს მოხდა – ჭავჭავაძისა და ასათიანის ქუჩების კვეთასთან კაცი ქუჩაში მიმავალ ორ არასრულწლოვან გოგოს თავს დაესხა – აგინა და სცემა.

„ქართველ გოგოს წითელი და მწვანე თმა რატომ უნდა ჰქონდესო“, – ეს პოლიციელის ჩვენებაა, რომელიც იმ დღეს შემთხვევის ადგილზე მივიდა.

მოსამართლეს ჩვენება მისცეს არასრულწლოვნებმაც. გოგოების თქმით, მათ კაცი გარეგნობის – პირსინგის, ტატუებისა და თმის ფერის გამო დაესხა თავს. არასრულწლოვანმა დაზარალებულებმა თქვეს ასევე, რომ დამნაშავის მკაცრად დასჯას ითხოვენ.

პროკურატურამ კაცს ბრალი დისკრიმინაციული მოტივით, ფიზიკური ძალადობის მუხლით წარუდგინა.

თეიმურაზ შაინიძეს ედავებიან ძაღლის ქურდობასაც, თუმცა ამ საქმის განხილვა ჯერ არ დასრულებულა. ამ საქმეში დაზარალებულად მიჩნეული ქალის თქმით, ძვირადღირებული ძაღლი ერთ-ერთ მარკეტში დაკარგა. ვიდეოკამერის ჩანაწერებით კი, ძაღლი იმ კაცს მიჰყავს, რომელიც უკვე ციხეში გაუშვეს.

წყარო: batumelebi.netgazeti.ge