ბევრჯერ გამიღვიძებია იმის შიშით, რომ ვეღარ ამოისუნთქავდა - რას ამბობს აქონდროპლაზიის მქონე ბავშვის დედა?

მთავრობის ადმინისტრაციასთან აქონდროპლაზიის დიაგნოზის მქონე ბავშვების მშობლების უწყვეტი პროტესტი გრძელდება.

დღევანდელ აქციას შეუერთდნენ მშობლები კახეთიდან და ბათუმიდან.

"კახეთიდან ჩამოვედი, ჩემ შვილს, შვიდი წლის არის ბარბარე, აქვს აქონდროპლაზია, ჩამოვედი იმიტომ, რომ ჩემ შვილს სჭირდება ვოსორიდიტი და არ წავალ იქამდე, სანამ ეს წამალი არ იქნება დაფინანსებული, ყოველ ღამეს აქ დავრჩები თუ საჭირო გახდება.

ბევრჯერ გამიღვიძებია იმის შიშით, რომ ვეღარ ამოისუნთქავდა და ძალიან რთულია მშობლისთვის. ყოველ ღამე თითქმის ღამის გათევა უწევს ბავშვს,რომ სუნთქვის პრობლემა არ შეექმნას და არ დამთავრდეს ფატალურად. ეს მედიკამენტი აუცილებელია ჩემი შვილისთვის, რომ უკეთესად იცხოვროს და უკეთესად ისუნთქოს“, - აცხადებს ერთ-ერთი მშობელი.

შეგახსენებთ, რომ მშობლებმა მთავრობის კანცელარიასთან უკვე მეთხუთმეტე დღეა რაც რჩებიან. მათი განცხადებით, წამალი "ვოსორიტიდი", რომლის ერთწლიანი დოზა დაახლოებით 200 000 დოლარი ჯდება, საქართველოში სულ 16 ბავშვს სჭირდება.