მიკრობების დნმ-ში 30 000 ახალი ვირუსი აღმოაჩინეს - მეცნიერების ახალი აღმოჩენა

მეცნიერებმა დაადგინეს, რომ მიკრობების დნმ-ში 30 000 ახალი ვირუსი აღმოაჩინეს.

„ამ ანალიზის შედეგად ამდენი ვირუსის აღმოჩენამ გაგვაოცა. ზოგ შემთხვევაში, აღმოჩნდა, რომ მიკრობთა დნმ-ის 10 პროცენტი მალული ვირუსებისგან შედგებოდა“, — ამბობს კვლევის ავტორი, ავსტრიის ქალაქ ინსბრუკის უნივერსიტეტის ეკოლოგი, ვირუსების მკვლევარი კრისტოფერ ბელასი.

მკვლევართა განცხადებით, როგორც ჩანს, ეს ვირუსები მათ მასპინძლებს არ აზიანებს და პირიქით, სასარგებლოც კი შეიძლება იყოს. ზოგიერთი ახალი ვირუსი ვიროფაგებს წააგავს — ვირუსთა ტიპს, რომელიც მასპინძელი უჯრედის პოტენციურ დამაინფიცირებელ სხვა პათოგენურ ვირუსებს აინფიცირებს.

„უცნობია, რატომ აღმოჩნდა მიკრობთა გენომში ამდენი ვირუსი. ჩვენი მთავარი ჰიპოთეზის მიხედვით, ისინი უჯრედს სახიფათო ვირუსებისგან იცავენ“, — ამბობს ბელასი.

დედამიწაზე ცხოვრება ვირუსებთან ბრძოლის გარეშე არ არსებობს. ისინი პლანეტაზე ყველაზე უხვ ბიოლოგიურ ერთეულებს წარმოადგენენ და სიცოცხლის თითქმის ყველა ფორმას აინფიცირებენ. არიან ძლიერ მრავალფეროვანი და უჯრედულ მასპინძელთა გამოყენებისთვის მრავალ სხვადასხვა ტაქტიკას იყენებენ.

მიუხედავად სემანტიკური დებატებისა იმის შესახებ, არის თუ არა ვირუსები ცოცხალი, ფაქტია, რომ ისინი სხვა ცოცხალი ერთეულების ცხოვრებაში იჭრებიან. ზოგიერთი მათგანი საკუთარ დნმ-ს მასპინძელ უჯრედს ამატებს, მრავლდება და მისი გენომის ნაწილი ხდება.

როდესაც ეს ჩანასახოვან უჯრედში ხდება, შეიძლება წარმოქმნას ენდოგენური ვირუსული ელემენტები, ანუ ვირუსული დნმ ერთი თაობიდან შემდეგს გადაეცეს მასპინძელ სახეობაში.

ენდოგენური ვირუსული ელემენტები (EVE) მეცნიერებმა ორგანიზმთა ფართო სპექტრში აღმოაჩინეს, მათ შორის, ცხოველებში,მცენარეებსა და სოკოებში. ძუძუმწოვრებს დნმ-ში სხვადასხვა სახის ვირუსული ფრაგმენტები აქვთ. მაგალითად, ადამიანის გენომის დაახლოებით რვა პროცენტი შედგება უძველესი ვირუსული ინფექციების დნმ-ისგან.

წყარო: 1tv.ge