მოხდა ტრაგიკული შემთხვევა, როდესაც ღაზას სექტორში ჩვენი ძალები უდანაშაულო ადამიანებს უნებლიედ, თავს დაესხნენ - ბენიამინ ნეთანიაჰუ
ისრაელის პრემიერ-მინისტრმა ბენიამინ ნეთანიაჰუმ დაადასტურა, რომ ისრაელის „უნებლიე“ თავდასხმას ღაზაში არასამთავრობო ორგანიზაცია World Central Kitchen-ის 7 თანამშრომელი ემსხვერპლა, რომლებსაც ღაზაში საკვები და ჰუმანიტარული ტვირთი გადაჰქონდათ. ამის შესახებ ინფორმაციას BBC ავრცელებს.
„სამწუხაროდ, ბოლო 24 საათის განმავლობაში მოხდა ტრაგიკული შემთხვევა, როდესაც ღაზას სექტორში ჩვენი ძალები უდანაშაულო ადამიანებს უნებლიედ თავს დაესხნენ. ასეთი რამ ომის დროს ხდება. ჩვენ ამ საქმეს ბოლომდე შევისწავლით, გვაქვს კონტაქტი მთავრობებთან და ყველაფერს გავაკეთებთ, რომ მსგავსი რამ აღარ განმეორდეს“, - განაცხადა ვიდეომიმართვაში ნეთანიაჰუმ.
ცნობისთვის, არასამთავრობო ორგანიზაციის აღმასრულებელმა დირექტორმა განაცხადა, რომ მის თანამშრომლებზე თავდასხმის გამო ორგანიზაცია ღაზას სექტორში მუშაობას დაუყოვნებლივ აჩერებს.
