გერმანიაში, რუსეთის სასარგებლოდ ჯაშუშობაში ეჭვმიტანილი ორი პირი დააკავეს

სამხრეთ გერმანიის შტატ ბავარიაში ორი სავარაუდო ჯაშუში დააკავეს, რომლებიც ეჭვმიტანილნი არიან რუსეთის სასარგებლოდ ჯაშუშობაში - უკრაინისთვის გერმანიის სამხედრო დახმარების უზრუნველყოფის საბოტირების მცდელობაში. გერმანიისა და რუსეთის  ორმაგი მოქალაქეობის მქონე ორი მამაკაცი ბაიროითში დააკავეს.

39 წლის დიტერ ს. რიგ ჯაშუშურ დანაშაულებშია ეჭვმიტანილი, მათ შორის აფეთქებისა და ხანძრის გაჩენის დაგეგმვასა და რუსეთის დაზვერვის სამსახურთან კონტაქტში. მას ასევე ბრალი ედება ოკუპირებულ აღმოსავლეთ უკრაინაში რუსეთის მარიონეტული შეიარაღებული ძალებისთვის სასარგებლოდ ბრძოლა.

მეორე ეჭვმიტანილს, რომელიც იდენტიფიცირებულია, როგორც ალექსანდრე ჯ., ბრალად ედება აპრილის შემდეგ თანამზრახველისთვის დახმარების გაწევა თავდასხმის პოტენციური სამიზნეების იდენტიფიცირებაში. ის სასამართლოში 18 აპრილს უნდა გამოცხადებულიყო. 

პროკურორების მტკიცებით, დიტერ ს-მა პოტენციური სამიზნეები, მათ შორის აშშ-ის სამხედრო ობიექტები, შეისწავლა და ფოტო-ვიდეო მასალა რუს მხარეს გადასცა. გერმანიის იუსტიციის მინისტრმა მარკო ბუშმანმა გერმანულ საინფორმაციო სააგენტო DPA-ს განუცხადა, რომ ეჭვმიტანილთა დაკავება "კიდევ ერთი მნიშვნელოვანი საგამოძიებო წარმატებაა" რუსეთის პრეზიდენტის ვლადიმერ პუტინის დივერსიული და ჯაშუშური ქსელების წინააღმდეგ ბრძოლაში.

როგორც ცნობილია, ბერლინის მთავრობა გეგმას ხელმძღვანელობს, რომელიც უკრაინის საჰაერო თავდაცვის გაძლიერებას ითვალისწინებს. აშშ-ის შემდეგ, უკრაინისთვის გერმანია მეორე უმსხვილესი დონორია, რომელმაც ქვეყანას 2022 წლის თებერვლიდან 28 მილიარდი ევრო გამოუყო.