უკრაინას სჭირდება არა მხოლოდ რუსეთის დამარცხება, არამედ ქვეყნის შიგნით კორუფციის დაძლევაც, რათა რუსეთს არ დაემსგავსოს - ბლინკენი
აშშ-ის სახელმწიფო მდივანმა ენტონი ბლინკენმა განაცხადა, რომ უკრაინას სჭირდება არა მხოლოდ რუსეთის დამარცხება, არამედ ქვეყნის შიგნით კორუფციის დაძლევაც, რომელიც არანაკლებ საფრთხეს წარმოადგენს მისი დემოკრატიისთვის.
ბლინკენმა მოუწოდა უკრაინის ხელისუფლებას გააგრძელონ რეფორმები, რათა ისინი არა მხოლოდ მიღებულ იქნეს, არამედ განხორციელდეს და ხელშესახები გავლენა იქონიოს ხალხის ცხოვრებაზე.
„ეს ნიშნავს კორუფციის ერთხელ და სამუდამოდ აღმოფხვრას. ბრძოლის ველზე გამარჯვება უკრაინას საშუალებას მისცემს, არ გახდეს რუსეთის ნაწილი. კორუფციის წინააღმდეგ ომში გამარჯვება უკრაინას საშუალებას მისცემს, არ დაემსგავსოს რუსეთს“, - აღნიშნა ბლინკენმა.
მან განსაკუთრებით ხაზგასმით აღნიშნა, რომ რუსეთის მმართველი ვლადიმირ პუტინი ცდილობს გამოიყენოს კორუფცია უკრაინაში უთანხმოების დასათესად და მიუხედავად მის წინააღმდეგ ბრძოლაში მნიშვნელოვანი მიღწევებისა, „ათიდან რვა უკრაინელი მაინც მიიჩნევს, რომ არსებობს კანონი ელიტებისთვის და კანონი ყველა დანარჩენისთვის“.
