სოფელ ჭორვილასთან ხმაური იყო - ადგილობრივებმა აქციის მონაწილეები სოფელში არ შეუშვეს
ხმაური იყო სოფელ ჭორვილასთან. ერთმანეთს სიტყვიერად ჭიათურიდან ჩასული აქციის მონაწილეები და ადგილობრივები დაუპირისპირდნენ.
ჭორვილაში მცხოვრებლებმა, აქციის მონაწილეები სოფელში არ შეუშვეს.
მათი თქმით, პროტესტი ჭიათურაში გააგრძელონ, სოფელში კი ხმაურს არ დაუშვებენ.
„პროტესტი გამოხატეთ ჭიათურაში, აქ რატომ მოდიხართ, რა შუაშია? თან მოხვედით, პლაკატებით და ჟურნალისტებით, პროვოკაცია გსურთ და არაა თქვენი პრობლემის გაჟღერება. ამიტომ, რა თქმა უნდა, არ მოგცემთ უფლებას შეხვიდეთ სოფელში”, - მიმართეს ადგილზე მყოფებმა აქციის მონაწილეებს.
სოფელ შუქრუთის მცხოვრებლები, რომლებიც 165 დღეა აქციას მართავენ, „ქართული ოცნების“ საპატიო თავმჯდომარის, ბიძინა ივანიშვილის სახლთან მისვლას აპირებდნენ, რათა მისთვის ცენტრალურ ხელისუფლებასთან შუამდგომლობის დახმარება ეთხოვათ.
ამ დროისთვის ადგილზე სიმშვიდეა, აქციის მონაწილეები შუქრუთში დაბრუნდნენ.
შეგახსენებთ, რომ ჭორვილაში, ბიძინა ივანიშვილის სახლთან, შუქრუთისა და კოროხნალის მაღაროების გაჩერების მოთხოვნით, ადგილობრივი მოსახლეობა აქციის გამართვას გეგმავდა. აქციის მონაწილეების მოთხოვნა ადგილობრივი მაღაროების მუშაობის გაჩერება და კომპანიის მხრიდან კომპენსაციების გაცემაა.
კომპანია "ჯორჯიან მანგანეზის" ინფორმაციით, შუქრუთის მოსახლეობის ნაწილს, რომლებიც მაღაროების ბლოკირებას ახდენენ, კომპენსაცია მოღებული აქვთ და ამჯერად, დამატებით თანხებს მოითხოვენ.
