მარქსიზმ-ლენინიზმის ინსტიტუტიდან სასტუმრომდე - იმელის შენობის ისტორია
იმელის შენობა, რომელიც 1938 წელს აშენდა ალექსეი შჩუსევის პროექტით, რუსთაველის გამზირზე მდებარეობს და სოციალისტური კლასიციზმის გამორჩეული ნიმუშია. თავდაპირველად მასში მარქს-ენგელს-ლენინის ინსტიტუტის თბილისის ფილიალი ფუნქციონირებდა. შემდგომ წლებში შენობის მფლობელები და დანიშნულება არაერთხელ შეიცვალა.
1933 წელს ლავრენტი ბერიამ სტალინის ინსტიტუტის პროექტირებისთვის დახურული კონკურსი გამოაცხადა, რომელშიც თბილისისა და მოსკოვის წამყვანი არქიტექტორები მონაწილეობდნენ. ჟიურიმ გამარჯვებულად ალექსეი შჩუსევის პროექტი გამოარჩია. 1934 წელს, რუსთაველის გამზირისა და კურსანტების ქუჩის კუთხეში, შენობის მშენებლობა სწორედ ამ პროექტის მიხედვით დაიწყო.
მშენებლობის დასაწყისი 1934 წელი
შენობა სიმეტრიული, სამნაწილიანია და სტალინისტურ არქიტექტურას ქართული ტრადიციული ელემენტები ერთვის. მისი მშენებლობისას პირველად გამოიყენეს არმირებული პემზობეტონი, რაც მას განსაკუთრებულ საინჟინრო ღირებულებას ანიჭებდა.
1992-1995 წლებში საქართველოს პარლამენტი მასში იყო განთავსებული, 1995 წლიდან კი – საკონსტიტუციო სასამართლო. 1990-იან წლებში შენობიდან საბჭოთა სიმბოლიკა ჩამოხსნეს, 1997 წელს კი ის კულტურულ მემკვიდრეობის ძეგლთა სიაში შევიდა.
1992 წლის გადატრიალების შემდეგ, იმელის საკონფერენციო დარბაზში ფუნქციონირებდა "სამხედრო საბჭო" და შემდეგში ქვეყნის საკანონმდებლო ორგანო
2007 წელს ის პრივატიზდა, სტატუსი მოეხსნა და მალე კომპანია „კაპიტალ ინვესტს“ გადაეცა. დაგეგმილი სასტუმრო „კემპინსკის“ მშენებლობა არ განხორციელდა, ხოლო 2011 წელს მერიამ ნებართვა გასცა მის უკან ცათამბჯენის ასაშენებლად. 2016 წელს შენობის რეაბილიტაცია დასრულდა და მასში სასტუმრო „ბილთმორ თბილისი“ განთავსდა.
