2015 წელს ავტოსაგზაო შემთხვევების შედეგად საქართველოში 602 ადამიანი დაიღუპა

2015 წელს ავტოსაგზაო შემთხვევების შედეგად საქართველოში 602 ადამიანი დაიღუპა, 9187 კი დაშავდა. საგზაო სატრანსპორტო შემთხვევების 2012-2015 წლების სტატისტიკა, შინაგან საქმეთა სამინისტროს ოფიციალურ მონაცემებზე დაყრდნობით, "ინტერპრესნიუსს" არასამთავრობო ორგანიზაცია "საქართველოს ალიანსი უსაფრთხო გზებისთვის" მიაწოდა.

შსს-ს ოფიციალური სტატისტიკით, გასულ წელს საქართველოში 6432 რეგისტრირებული საგზაო სატრანსპორტო შემთხვევა მოხდა. ეს მაჩვენებელი 440-ით აღემატება 2014 წლის მონაცემებს. 922-ით მეტია 2013 წლის რეგისტრირებულ შემთხვევებზე და 1073-ით აღემატება 2012 წლის მაჩვენებელს.
უფრო კონკრეტულად, 2012 წელს საქართველოში 5359 რეგისტრირებული საგზაო სატრანსპორტო შემთხვევა მოხდა, 2013 წელს 5510, ხოლო 2014 წელს 5992.

2012 წელს საქართველოში ავტოსაგზაო შემთხვევების შედეგად 605 ადამიანი დაიღუპა, 2013 წელს 514, 2014 წელს 511, 2015 წელს კი წინა წელთან შედარებით დაღუპულთა რაოდენობა 91-ით გაიზარდა და 602 შეადგინა.

გაზრდილია დაშავებულების რაოდენობაც. 2012 წელს ავტოსაგზაო შემთხვევების შედეგად 7734 ადამიანი დაშავდა, 2013 წელს 8045, 2014 წელს 8536, ხოლო 2015 წელს დაშავებულთა რაოდენობა წინა წელთან შედარებით 651-ით გაიზარდა და 9187 შეადგინა.

2015 წელს დაღუპულთა შორის 160 ქვეითია. დაშავებული ქვეითების რაოდენობა კი 1998-ია.

აღსანიშნავია, რომ გასულ წელს, ავტოსაგზაო შემთხვევების შედეგად დაღუპულთა შორის 28 ბავშვი იყო. 912-ს შეადგენს დაშავებული ბავშვების (0-16 წლამდე) რაოდენობა.

2015 წელს, ავტოსაგზაო შემთხვევების შედეგად მხოლოდ დედაქალაქში 90 ადამიანი დაიღუპა, 3834 კი დაშავდა. თბილისში დაღუპულებს შორის 43, დაშავებულებს შორის კი 1305 ქვეითია.