"ეთნიკოსი" ნიკა კაჭარავას და გუგა ფალავანდიშვილს ეროვნულ ნაკრებში არ უშვებს
საქართველოს ეროვნული ნაკრების მთავარმა მწვრთნელმა ვლადიმირ ვაისმა მოახლოებული ორი ამხანაგური მატჩისთვის ნაკრებში "ეთნიკოსის" ორ ფეხბურთელ, გუგა ფალავანდიშვილსა და ნიკა კაჭარავას უხმო, მაგრამ ვერცერთი ჩამოდის.
მართალია, ფალავანდიშვილი ჯერ ოფიციალურად არაა "ეთნიკოსის" ფეხბურთელი, მაგრამ როგორც შევიტყვეთ, "ტორპედოს" ყოფილი ნახევარმცველი ახალ კლუბთან 3-წლიან კონტრაქტს ორშაბათს, 9 იანვარს გააფორმებს.
საქმე იმაშია, რომ კაჭარავას და ფალავანდიშვილს ეროვნულ ნაკრებში კლუბი არ უშვებს, მიზეზი კი ისაა, რომ "ეთნიკოსს", რომელიც 17 ტურის შემდეგ 18 ქულით ჩემპიონატში მე-10 ადგილზეა, მნიშვნელოვანი მატჩები ელის და კლუბი ორივე ფეხბურთელს საჭიროებს.
შეგახსენებთ, რომ საქართველოს ეროვნული ნაკრები იანვარში, დუბაიში ორ ამხანაგურ მატჩს გამართავს. 23 იანვარს ჩვენი ნაკრები უზბეკეთის, ხოლო 25-ში იორდანიის ნაკრებს დაუპირისპირდება.
წყარო: sportall.ge
