ვფიქრობ, პროცესი წინ მიდის, ფრთხილი ოპტიმიზმით შეიძლება შევხედოთ ამ სიტუაციას - გიორგი ვაშაძე
„სტრატეგია აღმაშენებლის“ ლიდერის გიორგი ვაშაძის განცხადებით, უახლოეს პერიოდში დიპლომატიურ კორპუსთან მორიგი შეხვედრა გაიმართება, რომელშიც სავარაუდოდ, „ქართული ოცნებაც“ მიიღებს მონაწილეობას.
როგორც ვაშაძემ „ლელოს“ ოფისში ოპოზიციური პარტიის წევრებს შორის გამართული მოლაპარაკებების დასრულების შემდეგ განაცხადა, „პროცესი წინ მიდის“.
„ოპოზიციის ერთიანი პოზიციები შევაჯერეთ. გვიხარია, რომ საერთო პოზიციით უკვე ვემზადებით შემდგომი შეხვედრისთვის დიპლომატიურ კორპუსთან, რომელშიც სავარაუდოდ, „ქართული ოცნებაც“ მიიღებს მონაწილეობას. ამის შემდეგ უკვე საჯაროდ შევძლებთ განხილვას ჩვენს მხარდამჭერებთან, მედიასაშუალებებთან თუ სხვადასხვა კუთხით ყველა იმ საკითხთან დაკავშირებით, რომელიც ახლა არის განხილვაში ზოგადად მოლაპარაკების პროცესში. ვფიქრობ, რომ პროცესი წინ მიდის. ფრთხილი ოპტიმიზმით შეიძლება შევხედოთ ამ სიტუაციას. რა თქმა უნდა, სხვადასხვა ვერსიები არის, ამდენი პოლიტიკური პარტია ვართ და ყველა ერთ აზრზე არ არის სხვადასხვა საკითხთან დაკავშირებით, რაც აბსოლუტურად ლოგიკურია, მაგრამ საერთო სტრატეგიაში ჩვენ ერთიანები ვართ. ერთიანი პოზიციით წარვდგებით შემდგომ შეხვედრაზე“,-განაცხადა ვაშაძემ.
