ნინო ლომჯარია - პროკურატურას დღესვე შეუძლია, ნიკა მელია გაათავისუფლოს
პროკურატურას დღესვე შეუძლია, ნიკა მელია გაათავისუფლოს, - ამის შესახებ სახალხო დამცვემა, ნინო ლომჯარიამ სასჯელაღსრულების მე-12 დაწესებულებაში „ნაციონალური მოძრაობის“ თავმჯდომარე ნიკა მელიასთან შეხვედრის შემდეგ განაცხადა.
მისი შეფასებით, მელია თვლის, რომ არ უნდა გადაიხადოს გირაო.
„გვქონდა ზოგადი საუბრები. ნამდვილად არ გამოვსულვარ ციხიდან იმ მიზნით, რომ ნიკას დანაბარები საზოგადოებას გადავცე. ამ ფუნქციას ალბათ მისი ადვოკატები შეასრულებენ.
დამრჩა შთაბეჭდილება, რომ ისევ იმ პოზიციაზეა, რაც ჰქონდა გირაოს საკითხთან დაკავშირებით. არ ვიცი, რა იქნება ხვალ და რა შეიძლება, იყოს იმისი წინაპირობა, რომ ეს პოზიცია შეიცვალოს. მას მიაჩნია, რომ გირაო არ ყოფილა ამ შეთანხმების საგანი და არ ყოფილა ამ შეთანხმებით გათვალისწინებული. ასევე საუბრობს, რომ მასთან არ ყოფილა გირაოსთან დაკავშირებით წინასწარი კონსულტაციები მხარეების მხრიდან.
ჩემი პოზიცია არის ის, რომ პროკურატურას დღესვე შეუძლია, გაათავისუფლოს ნიკა მელია. გირაოს შეფარდების გარეშეც არის ეს შესაძლებელი და თუ ხელისუფლება დაინტერესებულია, პოლიტიკური სიტუაციის სტაბილიზაცია მოხდეს, შეთანხმება და სამოქალაქო მშვიდობა იყოს, მათ ეს შეუძლიათ, თავისუფლად გააკეთონ. ჩემი რეკომენდაციაა, რაც შეიძლება სწრაფად გააკეთონ ეს.
მელია თვლის, რომ არ უნდა გადაიხადოს გირაო. სწორედ იმიტომ ჩაჯდა ციხეში, რომ თვლიდა, არ იყო სამართლიანი მისი მხრიდან გირაოს გადახდა და ფიქრობს, რომ შეთანხმების გამოსავალი მასთან დაკავშირებით არ უნდა იყოს გირაოს გადახდა“, – განაცხადა ნინო ლომჯარიამ.
