რატომ დააკავეს ხუთი აფთიაქის ხელმძღვანელი
ფინანსთა სამინისტროს საგამოძიებო სამსახურმა თბილისის მასშტაბით გამოავლინა ხუთი აფთიაქი, საიდანაც უნებართვოდ და სანებართვო პირობების დარღვევით, სისტემატურად, რეცეპტის გარეშე ხდებოდა სხვადასხვა დასახელების ფსიქოტროპული და სპეციალურ კონტროლს დაქვემდებარებული მედიკამენტების რეალიზაცია.
ამასთან დაკავშირებით საგამოძიებო სამსახური ინფორმაციას ავრცელებს.
„5 მაისს, შესაბამისი განჩინების საფუძველზე, დააკავეს ხუთი აფთიაქის ხელმძღვანელი პირი, რომელთაც ბრალად ედებათ უკანონო სამეწარმეო საქმიანობის განხორციელება.
საგამოძიებო მოქმედებების შედეგად, ხსენებული აფთიაქებიდან ამოღებულია დიდი ოდენობით სხვადასხვა დასახელების ფსიქოტროპული მედიკამენტი.
მიმდინარეობს შესაბამისი საგამოძიებო მოქმედებები. გამოძიება გრძელდება საქართველოს სისხლის სამართლის კოდექსის 192-ე მუხლის პირველი ნაწილით, რაც სასჯელის სახით ითვალისწინებს თავისუფლების აღკვეთას ერთიდან სამ წლამდე ვადით“, – აღნიშნულია ინფორმაციაში.
