მნიშვნელოვანია ჟანგბადის რაციონალური მოხმარება იყოს - ეკატერინე ტიკარაძე
მნიშვნელოვანია იყოს ჟანგბადის რაციონალური მოხმარება, საჭიროების მიხედვით, ვინაიდან არამხოლოდ კოვიდის კომპონენტში, არამედ სხვა სომატური პაციენტებისა და საავადმყოფოებისთვისაც მნიშვნელოვანია მისი გარკვეული მოცულობების გადანაწილება, - ამის შესახებ საქართველოს ჯანდაცვის მინისტრმა, ეკატერინე ტიკარაძემ განაცხადა.
მინისტრის განმარტებით, ამ დროისთვის საავადმყოფოებში განთავსებული პაციენტების რაოდენობა ჟანგბადის რაციონალურად მოხმარების საშუალებას იძლევა.
„ყველამ იცის, რომ სახელმწიფო აქტიურად არის ჩართული ჟანგბადის მოწოდების პროცესში, არამხოლოდ ჯანდაცვის სამინისტრო, ასევე ეკონომიკის სამინისტრო აქტიურად არის მომარაგებაში და ყველა იმ საკითხის ტექნიკურ უზრუნველყოფაში, რომლის საჭიროებაც იკვეთება ჩართული, ასევე ძალიან აქტიურად არიან ჩართულები ჩვენი ელჩები და საგარეო საქმეთა სამინისტროს, ზოგადად პანდემიის კომპონენტში ჩართულობა არის ნამდვილად უპრეცედენტო და ჩვენი ყველა ელჩი, როგორც მეზობელ ქვეყნებში ასევე ცოტა დაშორებულ ქვეყნებშიც აქტიურად არიან ჩართულნი, არამხოლოდ ჟანგბადის, სხვადასხვა საჭირო საშუალებების მოძიებაში და საკონტრაქტო პირობების მოლაპარაკებებში, რისთვისაც მათ მადლობა მინდა გადავუხადო. ჟანგბადის შემთხვევაშიც ეს ჩართულობა ორივე სამინისტროსგან არის ძალიან აქტიური და ისინი მაქსიმალურს ცდილობენ, თუმცა მნიშვნელოვანი არის ის, რომ ჩვენი მხრიდანაც იყოს რაციონალური მოხმარება, საჭიროების მიხედვით, ვინაიდან არამხოლოდ კოვიდის კომპონენტში, არამედ სხვა სომატური პაციენტებისა და საავადმყოფოებისთვისაც მნიშვნელოვანია ჟანგბადის გარკვეული მოცულობების გადანაწილება და დღეს არსებული პაციენტების რიცხვი, რომელიც საავადმყოფოებში არიან განთავსებული, ნამდვილად გვაძლევს იმის საშუალება, რომ ჟანგბადის რაციონალური მოხმარება იყოს“, - განაცხადა ტიკარაძემ.
შეგახსენებთ, რომ საქართველო კორონავირუსის გავრცელების და გარდაცვალებით მსოფლიოში მოწინავე პოზიციაზეა. დღეს ანტირეკორდი დაფიქსირდა - ქვეყანაში კორონავირუსით 86 ადამიანი გარდიცვლა. ბოლო 24 საათის სტატისტიკას გაეცანით აქ.
