საიმედო პროგნოზი არ არის. იზრდება მძიმე ავადმყოფთა და ხელოვნურ ვენტილაციაზე მყოფ პაციენტთა რაოდენობა - ამირან გამყრელიძე
დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, ეპიდვითარება გართულდა და საიმედო პროგნოზი არ არის.
მისი შეფასებით, არსებული ვითარება ნელ-ნელა, პიკისკენ მიდის. ამის ფონზე კი იზრდება მძიმე ავადმყოფთა და ხელოვნურ ვენტილაციაზე მყოფ პაციენტთა რაოდენობა.
"დღევანდელი მონაცემებით, საიმედო პროგნოზი არ არის. დღეს ქვეყანაში აქტიური შემთხვევა არის 51 ათასი. უკვე სერიოზულად ეტყობა ზეწოლა ჯანდაცვის სისტემას. იზრდება სტაციონარში ავადმყოფთა რაოდენობა, იზრდება მძიმე ავადმყოფთა რაოდენობა და, ასევე, ხელოვნურ ვენტილაციაზე მყოფ პაციენტთა რაოდენობა.
ჩვენ დეკემბერში, პიკზე, გვქონდა 33-34 ათასი აქტიური შემთხვევა, აგვისტოს პიკზე გვქონდა 63 ათასი, მაგრამ, შორს აღარ არის 63 ათასი. თუ ყოველდღე 4-5 ათასი ახალი შემთხვევა იქნა ქვეყანაში, ჩვენ ძალიან სწრაფად მივალთ უკვე იმ ლიმიტამდე, რასაც ჯანდაცვის სისტემას შეუძლია გაუძლოს,"- აცხადებს გამყრელიძე.
ბოლო 24 საათში, საქართველოში კორონავირუსის 3 436 ახალი შემთხვევა გამოვლინდა, 4 483 ადამიანი გამოჯანმრთელდა, ხოლო კორონავირუსით 43 პაციენტი გარდაიცვალა.
