ოკუპირებული ცხინვალის დე ფაქტო რეჟიმი გაეროს რეზოლუციას პასუხობს

ოკუპირებული ე.წ. სამხრეთ ოსეთის „საგარეო საქმეთა სამინისტრომ" კომენტარი გააკეთა 7 ივნისს გაეროს გენერალური ასამბლეის 77-ე სესიის ფარგლებში მიღებულ რეზოლუციაზე სამხრეთ ოსეთიდან და აფხაზეთიდან იძულებით გადაადგილებულ პირთა და ლტოლვილთა მდგომარეობის შესახებ საქართველოს მიერ ინიცირებულ რეზოლუციაზე.

„გაეროს მიერ ამ ცალმხრივი დოკუმენტის ყოველწლიურ მიღებას, რომელიც აბსოლუტურად ამახინჯებს საქმის რეალურ მდგომარეობას, საქართველო კვლავ იყენებს პროპაგანდისტულ ნაბიჯად, რაც, საქართველოს ხელისუფლების განცხადებით, ლეგიტიმაციას ანიჭებს საქართველოს უკანონო პრეტენზიებს მეზობელი სახელმწიფოების ტერიტორიაზე, ასევე ხდება საერთაშორისო საზოგადოებისთვის არარსებული დღის წესრიგის დაწესება ე.წ. „საქართველოს ტერიტორიების ოკუპაციისა", - ნათქვამია დე ფაქტო უწყების განცხადებაში.

მათივე განმარტებით, დოკუმენტში სიტყვაც არ არის ნათქვამი, რომ ლტოლვილთა და იძულებით გადაადგილებულ პირთა პრობლემის მიზეზი 1989 წელს საქართველოს მიერ "სამხრეთ ოსეთისა" და აფხაზეთის ხალხების წინააღმდეგ განხორციელებული სამხედრო აგრესიაა.

„ასეთი შერჩევითი „დავიწყება" გააუქმებს გაეროს ამ ყოველწლიური რეზოლუციის მნიშვნელობას, რომელიც ტრადიციულად მიღებულია იმ ადამიანების აზრის გათვალისწინების გარეშე, ვისთვისაც, ფაქტობრივად, პრეტენზიები და მოთხოვნებია.

მრავალი წლის განმავლობაში რეგულარულად მიღებისას, ამ დოკუმენტს არავითარი წვლილი არ მიუძღვის იმ ადამიანების რეალური პრობლემების პრაქტიკულ გადაწყვეტაში, რომლებსაც ის ეძღვნება", - განაცხადეს ე.წ. სამინისტროში.

მათივე განცხადების მიხედვით, „პოლიტიკური დივიდენდების შეგროვების მიზნით განხორციელებული ასეთი ქართული ინიციატივები სერიოზულად ართულებს ჟენევის დისკუსიების მუშაობას, დიალოგის ერთადერთ ფორმატს, რომელიც "სამხრეთ ოსეთის", აფხაზეთისა და საქართველოს წარმომადგენლებს საშუალებას აძლევს პირდაპირ გაცვალონ შეხედულებები".