საქართველოს უძრავ ქონებაზე რუსების მოთხოვნა ერთ წელიწადში 447%-ით გაიზარდა

საქართველოს უძრავ ქონებაზე რუსების მოთხოვნა ერთ წელიწადში 447%-ით გაიზარდა. ამის შესახებ უძრავი ქონების საერთაშორისო საბროკერო კომპანია Tranio-ს კვლევაში წერია, რასაც რუსული “კომერსანტი” ავრცელებს.

კერძოდ, წლის პირველ ნახევარში უცხოურ უძრავ ქონებაზე რუსების მთლიან განაცხადებში საქართველოს წილი 5%-ს შეადგენს, მაშინ, როცა 2025 წლის ანალოგიურ პერიოდში ეს მაჩვენებელი მხოლოდ 1% იყო. ამდენად, მოთხოვნის წლიურმა ზრდამ 447% შეადგინა, რითაც საქართველო სხვა ქვეყნებს შორის ლიდერია.

უძრავ ქონებაზე რუსების განაცხადებში ყველაზე დიდი წილი ტაილანდს უკავია (16%), ხოლო მის შემდეგ თანაბარი 9%-იანი წილით საბერძნეთი და არაბთა გაერთიანებული საემიროებია. თუმცა ამ წამყვან სამეულში მოთხოვნა ყველაზე მეტად საბერძნეთის უძრავ ქონებაზე გაიზარდა (+86%), ხოლო რეიტინგის ლიდერ ტაილანდზე, პირიქით, 27%-ით შემცირდა.

წლის პირველ ნახევარში უცხოურ უძრავ ქონებაზე რუსების მოთხოვნაში ლიდერი ქვეყნების წილი ასეთია:

• ტაილანდი 16% (2025 წლის ანალოგიურ პერიოდთან შედარებით -27%)
• საბერძნეთი 9% (+86%)
• არაბთა გაერთიანებული საემიროები 9% (+7%)
• ესპანეთი 8% (+29%)
• თურქეთი 7% (0%)
• კვიპროსი 7% (+37%)
• საფრანგეთი 6% (-22%)
• საქართველო 5% (+447%)
• მონტენეგრო 4% (+38%)

ამდენად, მოთხოვნის ზრდით საქართველო ლიდერობს, შემდეგი კი საბერძნეთი და მონტენეგროა. უძრავ ქონებაზე რუსების მოთხოვნა ერთ წელიწადში მხოლოდ ტაილანდსა და საფრანგეთში შემცირდა, თურქეთში კი უცვლელი დარჩა.