ტყუილად არ ამბობენ, რომ გულშემატკივარი მეთორმეტე მოთამაშეა. მათი მხარდაჭერა ჩვენთვის არის უდიდესი ძალა - იაშვილი

ერთა ლიგის B დივიზიონის მეორე ტურში საქართველოს ეროვნული საფეხბურთო ნაკრები ტირანაში ალბანეთს დაუპირისპირდება. შეხვედრა თბილისის დროით 22:45 საათზე დაიწყება.

"ალბანეთი არის ძალიან რთული მეტოქე. მათაც ძალიან კარგი ევროპის ჩემპიონატი ითამაშეს. რა თქმა უნდა, მიზანია დავანახოთ, რომ შეგვიძლია ამ დონეზე სისტემატურად თამაშიდან თამაშამდე უფრო კარგად ვითამაშოთ.

ევროპის ჩემპიონატზე უდიდესი ძალა იყო ჩვენი გულშემატკივარი და ფეხბურთში ტყუილად არ ამბობენ, რომ გულშემატკივარი მეთორმეტე მოთამაშეა. მათი მხარდაჭერა ჩვენთვის არის უდიდესი ძალა და ფეხბურთელებს უფრო მეტის გაკეთების შესაძლებლობას აძლევს“, - აღნიშნა იაშვილმა.

საქართველო ალბანეთის მატჩის ყურება შესაძლებელი იქნება რესპუბლიკის მოედანზე, სადაც სპეციალური ეკრანები დამონტაჟდება.

ერთა ლიგის ახალი გათამაშება ორივე გუნდმა გამარჯვებით დაიწყო. 7 სექტემბერს, პირველ ტურში საქართველოს ნაკრებმა ჩეხეთს 4:1 სძლია, ალბანეთმა კი პრაღაში უკრაინასთან 2:1 გაიმარჯვა.