"ერთი ვაგონი, მინიმუმ, 300 მგზავრს გადაიყვანს" - თბილისში ტრამვაი ბრუნდება?!
თბილისი, თავისი მრავალფეროვანი ისტორიული და ურბანული განვითარებით, მუდმივად ეძებს ტრანსპორტის უკეთეს ალტერნატივებს. ბოლო წლებში სულ უფრო აქტიურად განიხილება ტრამვაის დაბრუნების იდეა, რომელიც წარსულში ქალაქის ერთ-ერთი მთავარი სატრანსპორტო საშუალება იყო. პროექტს, რომლის რეალურად განხორციელების შესაძლებლობას თბილისის სატრანსპორტო კომპანია განიხილავს, ახალი ხაზის მშენებლობის პერსპექტივაა.
ახალი გეგმის მიხედვით, დიდი დიღომი დიდუბეს ტრამვაის ხაზით უნდა დაუკავშირდეს, მაგრამ იდეის საბოლოოდ განხორციელება მას შემდეგ გადაწყდება, რაც პროექტის ხარჯთაღრიცხვის დოკუმენტი მომზადდება. საპროექტო-სახარჯთაღრიცხვო დოკუმენტაციის შედგენასა და სამშენებლო სამუშაოების Design-Build (DB) მეთოდით შესყიდვის მიზნით ბაზრის კვლევაზე კონკურსი თბილისის სატრანსპორტო კომპანიამ უკვე გამოაცხადა.
ამ დროისთვის არსებული გეგმით, ტრამვაის ხაზი დიდი დიღმის მე-3 და მე-4 მიკრო-რაიონების კვეთიდან დაიწყება, გაივლის დავით აღმაშენებლის ხეივანს, დიღმის მასივს და მეტროსადგურ „დიდუბის“ მიმდებარე ტერიტორიაზე გაჩერდება. როგორც კვლევის დოკუმენტშია მითითებული, 7,5 კილომეტრიან ხაზზე 11 სადგური მოეწყობა, ტრამვაის შემადგენლობა 10 ერთეულით განისაზღვრება და ერთი ვაგონი, მინიმუმ, 300 მგზავრს გადაიყვანს. პროექტის განხორციელების სავარაუდო ვადა კი 4,5 წელია.
ამის მიუხედავად, დოკუმენტში მითითებულია, რომ გაჩერებების რაოდენობა და ადგილი ოპტიმალურად, მგზავრთნაკადის კვლევის საფუძველზე უნდა განისაზღვროს. ასევე გათვალისწინებული უნდა იყოს მგზავრთა უსაფრთხოება და თანამედროვე, ევროპული ან საერთაშორისო სტანდარტები.
რამდენად პრაგმატულად არის შერჩეული ადგილი? ეს ლოგიკური კითხვა, შესაძლოა, ბევრ ადამიანს გაუჩნდეს. პროექტის განსახორციელებლად დიდი დიღმის შერჩევა გამართლებულია ურბანისტებისთვის. მათი თქმით, ამ უბნიდან ქალაქის ცენტრისკენ მგზავრობა საკმაოდ დიდ გამოწვევებთან არის დაკავშირებული, ავტობუსების საკმარისი რაოდენობა არ არის და, ამავდროულად, არსებული მშენებლობების ფონზე, მგზავრთნაკადის კიდევ უფრო მეტად ზრდაა მოსალოდნელი.
მაგალითად, არქიტექტორი, ირაკლი როსტომაშვილი დედაქალაქში სატრანსპორტო ხაზის აღდგენა-განვითარებას მიესალმება და ამბობს, რომ ამ ადგილას პროექტის განხორციელება ძალიან სასარგებლო იქნება ქალაქისთვის.
ამავდროულად, ირაკლი როსტომაშვილი 25 წლის წინანდელ გეგმასაც იხსენებს, რომლის თანახმადაც თბილისში ორი მნიშვნელოვანი სატრანსპორტო ჰაბი უნდა გამართულიყო, რომელთა შორისაც, ტრამვაის 35 კილომეტრიანი ხაზი მოეწყობოდა.
"ამ პროექტის მიხედვით, ტრამვაის ხაზი მტკვრის ხეობას გაუყვებოდა, რომელსაც დაუკავშირდებოდა განივი, დამოუკიდებელი ხაზები. ამ პროექტის განხორციელება, ნამდვილად მნიშვნელოვნად განტვირთავს თბილისს და დედაქალაქის სატრანსპორტო პოლიტიკის კარდინალური გადაწყვეტილება იქნება“, — ამბობს ირაკლი როსტომაშვილი.
