როგორ ვმართოთ კონფლიქტური კომუნიკაცია მობინადრეებთან? - ინტერვიუ გუგა შონიასთან

თანამედროვე საცხოვრებელი კომპლექსების მართვაში მობინადრეებთან ურთიერთობის დეპარტამენტს ერთ-ერთი ყველაზე საპასუხისმგებლო როლი აკისრია. სწორედ ისინი ხვდებიან პირველები კითხვებს, პრეტენზიებს, მადლობებსა და კრიტიკას. სწორედ მათზეა დამოკიდებული, ნდობა მობინადრესა და დეველოპერს შორის. tia.ge-მ ჩაწერა ინტერვიუ გუგა შონიასთან, ვისაც 4000-მდე მობინადრესთან აქვს კომუნიკაცია და პასუხს აგებს მათ კომფორტსა და ინფორმირებულობაზე.

როგორია თქვენი ურთიერთობის სტანდარტები მობინადრეებთან? არსებობს თუ არა კონკრეტული კომუნიკაციის პოლიტიკა?

- რა თქმა უნდა, გვაქვს გაწერილი შაბლონები, რომლის მიხედვითაც გვაქვს კომუნიკაცია მობინადრეებთან სხვადასხვა საკითხზე, თუმცა ამ პოზიციის ერთ-ერთი მთავარი დამახასიათებელი თვისება არის ის, რომ ყველა მობინადრესთან ერთნაირი კომუნიკაციის სტანდარტი ვერ გექნება. ყველა ადამიანი განსხვავებულია და საჭიროებს განსხვავებულ მიდგომას. ამიტომაც ჩვენს საქმიანობაში მნიშვნელოვანია შევინარჩუნოთ სიმშვიდე არ ავყვეთ ნერვებს და ცივი გონებით ვიმოქმედოთ. შეიძლება არ გვქონდეს უეცრად მობინადრის მიერ დასმულ პრობლემაზე ზუსტი პასუხი, თუმცა მათ არ უნდა ვაგრძნობინოთ რომ არ ვიცით აღნიშული საკითხი, პირველ რიგში დავამშვიდოთ, დავპირდეთ პრობლემის მოგვარებას და შემდეგ ვეცადოთ მაქსიმალურად ჩვენი კომპეტენციის ფარგლებში მოვუგვაროთ პრობლემა.

როგორ ართმევთ თავს აგრესიულ ან უკმაყოფილო მობინადრეებთან კომუნიკაციას?

- აგრესიულ და უკმაყოფილო მობინადრეებთან კომუნიკაცია მეტად საფრთხილო საკითხია. ისინი ზოგჯერ სამართლიანად ან უსამართლოდ არიან აგრესიულები კომპანიის მიმართ, პირველი შემხვედრი წინაღობა კი ამ დროს მობინადრეებთან ურთიერთბის მენეჯერია. ამ პოზიციისთვის ერთ-ერთი უმნიშვნელოვანესი დამახასიათებელი თვისება არის ის, რომ მენეჯერს უნდა შეეძლოს მობინადრის თვალით შეხედოს სიტუაციას და სიღრმისეულად გაითავისოს მისი პრობლემა. ძირითადად ესეთ მობინადრეებს ვაძლევთ თავისუფლებას, რომ დაცალონ თავიანთი ნეგატივი არ ვერთვებით საუბარში, რათა უფრო არ მოვახდინოთ მათი დაძაბვა, შემდეგ კი ვცდილობთ დავუთქვათ მაქსიმალურად სწრაფი ვადა ამ პრობლემის მოსაგვარებლად.

როგორ აფასებთ მობინადრეების უკუკავშირს და როგორ იყენებთ მათ რეკომენდაციებს?

- ამ საქმიანობაში მნიშვნელოვანი ფაქტორია მობინადრეების აზრის გათვალისწინება. პირველ რიგში, უნდა მოვუსმინოთ მათ, გავიგოთ აქტუალური თემები მათთვის და იმაზე თუ რაზე არიან მეტად კონცენტრირებულები. ამ საკითხების დაზუსტების შემდეგ ვცდილობთ, რომ შევცვალოთ კომუნიკაცია.  ეს მნიშვნელოვანია პირველ რიგში კომპანიისთვის, რადგან იცვლება ადამიანის შეხედულებები დროის სვლასთან ერთად და ურთიერთობის ხარისხმაც უნდა აუწყოს ფეხი ამ ყოველივეს. 

რას ურჩევდით სხვა დეველოპერულ კომპანიებს მობინადრეებთან უკეთესი ურთიერთობისთვის?

- ჩემი რჩევა სხვა დეველოპერული კომპანიების მიმართ იქნება ის, რომ პირველ რიგში მოუსმინონ მობინადრეებს და გაითვალისწინონ მათი აზრები. ურთიერთობის დახვეწისთვის მნიშივნელოვანია რომ კომპანია მართალი იყოს მობინადრესთან, მიაწოდოს მას დროულად ინფორმაცია, რათა მობინადრეს ჰქონდეს მაქსიმალური ნდობა გამოცხადებული კომპანიის მიმართ. სწორი კომუნიკაცია არ არის მხოლოდ სწორი ინფორმაციის გადაცემა მობინადრისთვის, არამედ ამ ინფორმაციის გადაცემასაც სჭირდება სწორი ფორმულირება, ამ შემთხვევაში მობინადრე დაინახავს კომპანიისგან რომ ის ყველაფერს ცდილობს, რათა დაეხმაროს მას, რაც ნდობის ფაქტორს კიდევ უფრო ამაღლებს.

რაში ხედავენ მობინადრეები ყველაზე დიდ სირთულეს საცხოვრებელ კომპლექსებში?

- მშენებლობის პროცესი მოგეხსენებათ ხშირად ისე არ მიმდინარეობს როგორც არის დაგეგმილი, ხშირად არის ისე, რომ იწევა მშენებლობის ვადები და ეს შეიძლება გახდეს გაღიზიანების ერთ-ერთი მიზეზი, რადგან მობინადრეები მომზადებული არიან როგორც მენტალურად, ისე ფინანსურად რომ კონკრეტულ დროს გადავიდნენ სარემონტოდ ბინებში. თუ ამგვარად წარიმართა მდგომარეობა, კომპანიამ უნდა მოახდინოს დროული რეაგირება - წინასწარ გააფრთხილოს მობინადრე ყველა ცვლილებაზე და აუხსნას რეალური მიზეზი ამ შემთხვევაში ვადების გადაწევის. ხშირად არის შემთხვევა როცა ბინის კვადრატულობები იცვლება, შახტებისა თუ საქვაბე ადგილების გამო. ამ შემთხვევაშიც ღიზიანდება მობინადრე, რადგან თავდაპირველი შეთანხმების დროს ეს ყოველივე არ ყოფილა. აქაც კომპანია ვალდებულია ზუსტად და მკაფიოდ შეძლოს მობიანდრისთვის ახსნას დასმული საკითხი. პრობლემები იქმნება ექსპულატაციიის თემასთან დაკავშირებითაც, მაგრამ ეს კომანიისგან დამოუკიდებელი პროცესია და საჯარო სექტორზეა დამოკიდებული ეს ყოველივე, მაგრამ მობინადრეს ამ დროს კომპანიასთან აქვს კავშირი და ჰგონია რომ ამ ყოველივეში კომპანია არის დამნაშავე. აქაც უნდა მოხდეს საკითხის ზუსტი შეფასება მობინადრეებთან.