ძალიან მნიშვნელოვანია, ამ საქმეზე განახლდეს გამოძიება და გაეცეს კითხვებს პასუხი - ბაჩალიაშვილების ოჯახის ადვოკატი

გაურკვეველ ვითარებაში გარდაცვლილი 23 წლის თამარ ბაჩალიაშვილის ოჯახის ადვოკატები საქმეზე გამოძიების განახლებას ითხოვენ - მათი თქმით, "მთავარი არხის" გადაცემა "პოსტ ფაქტუმში" გასული სიუჟეტის შემდეგ ისეთი გარემოებები გამოიკვეთა, რითიც პროკურატურა უნდა დაინტერესდეს.

"საგამოძიებო უწყება საზოგადოებას აწვდიდა იმ მტკიცებულებებს, რაც მას სჭირდებოდა თავისი ვერსიის დასადასტურებლად. ჩვენ ვნახეთ გუშინ სხვა ჩანაწერებიც სადაც სულ სხვა სახით ვნახეთ ბაჩალიაშვილი. აქედან გამომდინარე, ძალიან მნიშვნელოვანია, რომ ამ საქმეზე განახლდეს გამოძიება, დაინტერესდეს ხელისუფლება, ის უწყებები, რომლებიც ამ საქმეზე მუშაობდნენ და დაჟინებით გვიმტკიცებდნენ, რომ ეს იყო ჩვეულებრივი, ბანალური თვითმკვლელობა და უნდა გაეცეს ამ კითხვებს პასუხი", - თქვა ადვოკატმა, ეკა ქობესაშვილმა.

ოჯახის კიდევ ერთი ადვოკატი, მიხეილ რამიშვილი ამბობს, რომ გამოძიებას არაფერი გაუკეთებია და კითხვები, რომელზეც პასუხი უნდა გაეცა, გამოტოვა.

"საქმე დაიხურა, რადგან ჩვენ სრული წვდომა არ გვქონოდა იმ მასალაზე, რა მასალაც ჰქონდა გამოძიებას", - თქვა მან.

ცნობისთვის, თამარ ბაჩალიაშვილი 2020 წლის 18 ივლისს გაუჩინარდა. 23 წლის პროგრამისტი სათვალთვალო კამერებმა ბოლოს თეთრიწყაროს რაიონში დააფიქსირეს. რამდენიმედღიანი ძებნის შემდეგ, ის სწორედ თეთრიწყაროს ტყეში, საკუთარ მანქანაში გარდაცვლილი იპოვეს.