"მოხდა ძალადობა და ბავშვის მოგუდვა. ვერსია, რომ გადაცდა საკვები და იყო კვებითი ასფიქსია, არაა სიმართლე" - რას აცხადებს ადვოკატი დიდ დიღომში 12 წლის გოგოს გარდაცვალების საქმეზე?

17 მარტს, თბილისში, დიდ დიღომში გარდაცვლილი 12 წლის ანას ოჯახი კვებით აქფიქსიას გამორიცხადს და სჯერა, რომ ბავშვზე მოხდა ძალადობა და შემდეგ განხორხიელდა მისი მოგურვა. ამის შესახებ 12 წლის ანა იანუშაიტიტეს ოჯახის ადვოკატი, ელისო რუხაძე აცხადებს.

- გადმოგვეცა საქმის მასალები. პროკურატურას მივაწოდეთ ინფორმაცია იმის შესახებაც, რომ შემთხვევის ადგილზე მერიამ კეთილმოწყობის სამუშაოები დაიწყო. ვუთხარით ისიც, რომ ტერიტორიაზე მერიის თანამშრომლებთან ერთად 4 აპრილს პოლიციის თანამშრომლებიც იმყოფებოდნენ. პროკურატურაში გვითხრეს 5 აპრილამდე, ანუ იმ დრომდე, სანამ ჩვენ ეს ინფორმაცია გავასაჯაროვეთ, მათ არ ჰქონდათ ინფორმაცია, რომ ამ ტერიტორიაზე კეთილმოწყობის სამუშაოები მიმდინარეობდა. მათივე თქმით, შსს-ს ამ სამუშაოებზე თანხმობა არ გაუცია.

- საქმის დეტალებზე რას იტყვით?

- ვინაიდან საქმე გვაქვს არასრულწლოვანთან, დეტალებში ვერ შევალ, ეს არის ოჯახის თხოვნაც, ასევე იმის გამოც, რომ აქტიურად მიმდინარეობს გამოძიება. იცით გამოძიება 109-ე მუხლით არის დაწყებული. საქმის მასალების ირგვლივ არაფრის თქმა არ შემიძლია, გარდა იმისა, რომ გამოძიება მუშაობს ორ ვერსიაზე - განზრახ მკვლელობა და უბედური შემთხვევა. მთავარი გადამწყვეტი ამ საქმეში ახლა იქნება ექსპერტიზის დასკვნა, რომელიც გარდაცვალების მიზეზს დაადგენს. ჩვენ მოგვმართა გარდაცვლილი გოგონას, ანის დედამ, ნატომ, გვითხრა რომ სჭირდებოდა სამართლებრივი დახმარება, რადგან გამოძიება არ მიდიოდა წინ და გამოძიება უფრო მეტად იხრებოდა უბედური შემთხვევის ვერსიაზე, ამიტომ უნდოდათ ჩვენ ჩავრთულიყავით. ჩვენ მოვითხოვეთ დედის დაზარალებულის უფლებამონაცვლედ ცნობა, ასევე მასალების გადმოცემა. გავედით შემთხვევის ადგილზე და იქ გაკაფული დაგვხვდა ის ხე, რომლის ქვეშაც იპოვეს გარდაცვლილი მოზარდი. იქ ახლა ყველაფერი ამოძირკვულია. მერიის თანამშრომლებმა გვითხრეს, რომ ტერიტორიას ასუფთავებდნენ და იქ სკვერს აკეთებენ. შემთხვევიდან 19 დღეში მერიამ დაიწყო იქ სამუშაოები, არადა გამოძიება ჯერ დასრულებული არ არის და გამოძიებას არანაირი ნებართვა არ გაუცია ამის შესახებ. საქმის დასრულებამდე წესით არ უნდა შეხებოდნენ.

- ოჯახი რა ვერსიას განიხილავს?

- ოჯახი გამოძიებას ელოდება. არაერთი ექსპერტიზაა საქმეზე დანიშნული, ქიმიური, ბიოლოგიური და მთავარ კითხვებს უნდა გაეცეს პასუხი. რა იყო სიკვდილის მიზეზი და ის დაზიანებები რაც მოზარდს ჰქონდა არის ადრინდელი, თუ სიკვდილის დროინდელია. ოჯახს და ჩვენ, ადვოკატებს კატეგორიულად გვჯერა, რომ გოგონა იქ ასეთ უდაბურ ადგილას თავისი სურვილით არ მივიდოდა, მას იმ ადგილას შესვლაც კი გაუჭირდებოდა. ან რატომ უნდა შესულიყო, როცა უმოკლესი გზა ჰქონდა სახლამდე მისასვლელად. გვჯერა, რომ სხვა პირის, დამნაშავის მხრიდან მოხდა ძალადობა, იქ ბავშვის შეყვანა და მისი მოგუდვა. საქმე ბურუსითაა მოცული, სავარაუდო მკვლელი შესაძლოა იყოს ჩასაფრებული თითოეულ სიტყვას და ინფორმაციას, თუ რაზე გადის გამოძიება, ამიტომ დეტალებზე ისედაც ვერ ვისაუბრებთ, სანამ კონკრეტული პირი არ გამოიკვეთება. ტერიტორიაზე, სადაც ანა იპოვეს, გარე განათება არ იყო. 4 აპრილამდე იქაურობა მთლიანად იყო გარშემოტყმული ბუჩქებითა და ჯაგნარით. ამ ტერიტორიას ადგილობრივი მოსახლეობა ძირითადად გზის შესამოკლებლად იყენებს.

- ბავშვს დაზიანებები ჰქონდა?

- სახის არეში ჰქონდა მცირედი ესკორაციები, ფხაჭებიხ და სხეულის სხვა ადგილებშიც ცოტა დაზიანებები აქვს.

- თავიდან გავრცელდა ინფორმაცია ოჯახმა ექპერტიზაზე უარი თქვაო, ეს მართალია?

- არა, ექსპერტიზა ცხედარს ჩაუტარდა. მოხდა გვამის გაკვეთა და ველოდებით ექსპერტიზას.

- გოგონა დეიდაშვილთან ერთად იმყოფებოდა, რას ამბობს დეიდაშვილი თავის ჩვენებაში?

- დეიდაშვილი ამბობს, რომ უმნიშვნელო ამბავზე წაკამათდნენ, წაკინკლავდნენ ისინი, ამიტომ დეიდაშვილი უფრო ადრე ამოვიდა სახლში და მას ანიმ უთხრა, რომ ცოტა ხანი დარჩებოდა ეზოში და საქანელაზე იქანავებდა. განათებულ ადგილას მოხდა მათი დაშორება, ხალხი მოძრაობდა, რაიმე სახის სახიფათო გარემოებაში ის დეიდაშვილს არ დაუტოვებია.

- თავდაპირველად ითქვა, რომ გოგონას გადაცდა საჭმელი და რომ ეს იყო კვებითი ასფიქსია, ამაზე რას იტყვით?

- ბავშვმა მიირთვა ერთჯერადი სუპი მშრალად და დააყოლა ენერგეტიკული სასმელი, მაგრამ ეს ხდებოდა ნახევარი საათით ადრე. მას ამის მირთმევის დროს არაფერი არ გადაცდენია. შემდეგ ქანაობდა საქანელაზე, ამიტომ ის ვერსია, რომ გადაცდა საკვები და იყო კვებითი ასფიქსია არ არის სიმართლე.

- გაუპატიურება გამოირიცხა?

- ამ კითხვებს გასცემს პასუხს ექსპერტიზა. ანას დედა სამედიცინო სფეროს წარმომადგენელია, მან დეტალურად დაათვალიერა თავისი შვილის ცხედარი. ამბობს რომ გოგონა გაუპატიურებული არ იყო. ერთ - ერთი ვერსია არის ოჯახისთვის და ჩვენთვისაც, რომ ეს იყო ხელით მოგუდვა. იმ პირობებში, რა პირობებშიც ნანახია ბავშვი, რომ განვიხილოთ უბედური შემთხვევა, ეს წარმოუდგენელია, ბავშვი იწვა გულაღმა, ნარჩენები ცხვირში და ფილტვში იყო გადატანილი, რაც ეჭვს ბადებს, რომ ბავშვს პირზე ხელი ააფარეს, რა დროსაც დაეწყო გულისრევა, ვერ მოახერხა ნაღებინების ამოღება პირიდან, რადგან ხელი ჰქონდა აფარებული.

- კიდევ ერთი ვერსია განიხილება, ხომ არ იყო ნარკოტიკული ნივთიერების ზემოქმედების ქვეშ.

- არა, ნარკოტიკს გამორიცხავს ოჯახი, ექსპერტიზის დასკვნით გაირკვევა ყველაფერი. ნარკოტიკი გამორიცხულია მისი ნება სურვილით მიეღო, რადგან ძალიან კარგი ოჯახი ჰყავს. თან იმ შუაღამისას ან სად უნდა მოეხერხებინა არასრულწლოვან პატარა გოგონას ასეთი რამე. ექსპერტიზის გარეშე ვერავინ ვერაფერს იტყვის. ასეთი კითხვები ყველა მკვლელობის საქმეში ისმევა ხოლმე. მკვლელობის ვერსიას განიხილავს ოჯახი და ალბათ გამოძიებაც, რადგან კვალიფიკაცია ისევ ისეა დარჩენილი. საგამოძიებო მოქმედებები გრძელდება.

ყველაზე მეტად მკვლელობის ვერსიას განვიხილავთ. ტერიტორია, სადაც ბავშვი ნახეს, მისი სახლიდან დაახლოებით 200 მეტრში მდებარეობს. ვფიქრობთ, ბავშვის გვამის გადამალვა მკვლელმა ნაგავსაყრელად ქცეულ ტერიტორიაზე, ხეების ქვეშ სცადა. ანას დედაც გამორიცხავს, რომ მისი შვილი საკვების გადაცდენით გამოწვეული პირღებინებით გაიგუდა. ის ამბობს, რომ ანა ძალადობას ემსხვერპლა. ანას სხეული დედამ მისხალ-მისხალ დაათვალიერა. ყვება, რომ ბავშვს არაერთი დაზიანება უპოვა, მათ შორის, ნაკაწრები მარცხენა ფეხზე, სახესა და ზურგზე. ამიტომ ფიქრობს რომ ეს არის ფიზიკური ძალადობის დროს მიყენებული. იმ ხეების ქვეშ, სადაც შუქი არსად არ იყო, ბავშვი თავისით ვერ შევიდოდა. თან იწვა გულაღმა, თუ საკვები გადასცდა და ამის გამო ღებინება დაეწყო, რატომ იწვა გულაღმა? ამიტომ არსებობს ვერსია, რომ ბავშვს, სავარაუდო მოძალადემ პირზე ააფარა ხელი და ამის გამო მასა არა პირიდან, არამედ ცხვირიდან გადმოვიდა.

წყარო: kvirispalitra.ge