"გაიმართება საზეიმო მსვლელობა-ლიტანიობა" - 17 მაისთან დაკავშირებით საპატრიარქო ინფორმაციას ავრცელებს
საპატრიარქოს საზოგადოებასთან ურთიერთობის სამსახურის ინფორმაციით, 17 მაისს ქაშვეთის ტაძარიდან სამების სახელობის საპატრიარქო ტაძრამდე საზეიმო მსვლელობა-ლიტანიობა გაიმართება.
"ჩვენი ეკლესიის ძვირფას შვილებს,
ღმერთი მშვიდობისა და სიყვარულისა იყოს თქვენთანა!
2014 წელს, სრულიად საქართველოს კათოლიკოს-პატრიარქის, უწმინდესისა და უნეტარესის, ილია II-ის ლოცვა-კურთხევით, 17 მაისი ოჯახის სიწმინდისა და მშობლების პატივისცემის დღედ გამოცხადდა.
ამ დღესთან დაკავშირებით ოთხშაბათს, 17 მაისს, საპატრიარქო ტახტის მოსაყდრე, სენაკისა და ჩხოროწყუს მიტროპოლიტი შიო (მუჯირი) დოქსოლოგიას აღასრულებს ქაშვეთის ტაძარში 12:00 საათზე, რის შემდეგაც შედგება საზეიმო მსვლელობა-ლიტანიობა ყოვლადწმინდა სამების სახელობის საპატრიარქო ტაძრამდე, სადაც შესრულდება სამადლობელი პარაკლისი.
მშვენიერ ტრადიციად ქცეული ჩვეულებრივობით ვიკრიბებით ყველა, სამღვდელოება და მრევლი, ოჯახებთან ერთად!
უფალმა დაგლოცოთ!",- აღნიშნულია გავრცელებულ ინფორმაციაში.
