19 აპრილის შეთანხმებაც თავიდან ბოლომდე იყო ანომალია - ირაკლი კობახიძე

პარტია „ქართული ოცნების“ თავმჯდომარემ, ირაკლი კობახიძემ ცეკოს დაკომპლექტების წესთან დაკავშირებით ისაუბრა და 19 აპრილის შეთანხმება და საარჩევნო კოდექსში არსებული წესი ანომალიებად შეაფასა.

„რა თქმა უნდა, 19 აპრილის შეთანხმებაც თავიდან ბოლომდე იყო ანომალია. ეს იყო უხეში და ღია მცდელობა, რომ ხალხის ნების წინააღმდეგ შეცვლილიყო ხელისუფლება, ანომალიაც არ იყო. ეს არის ის სახელი, რაც უნდა დაერქვას ძალიან ღიად, 19 აპრილის შეთანხმებას. სწორედ ამიტომ, ჩვენ ვთქვით ანულირების შემდეგ, რომ აღარასდროს ასეთ შეთანხმებას აღარ მოვაწერთ ხელს - ანომალიაზე აღარასდროს წავალთ. რაც უფრო მეტად მიიღებ ანომალიას, მით უფრო მეტად მოგახვევენ თავს ახალ-ახალ ანომალიებს, ამიტომ ერთხელ და სამუდამოდ, ამ ქვეყანაში ანომალიებზე უარი უნდა ითქვას. კონკრეტულად, ცესკოსთან დაკავშირებული ანომალიის მიზანიც იყო საბოტაჟი ცენტრალურ საარჩევნო კომისიაში.“ - აღნიშნა ირაკლი კობახიძემ.

მმართველი პარტიის თავმჯდომარემ ასევე განმარტა, რომ არსებული რეგულაციის დატოვების შემთხვევაში, 2024 წლის საპარლამენტო არჩევნების ჩატარებისას, ცესკოს თავმჯდომარის და ორ წევრის 6-თვიანი უფლებამოსილების ვადა გასული იქნება, რაც ოპოზიციას სპეკულაციების საბაბს მისცემს.

„წარმოიდგინეთ, რომ ჩვენ ვტოვებთ არსებულ რეგულაციას, რაც დღესაც არის მოცემული. ამ შემთხვევაში, ერთი ვარიანტია, რომ პრეზიდენტი უარს ამბობს ობიექტური კრიტერიუმების შესაბამისად კანდიდატურების წარმოდგენაზე, შესაბამისად გვრჩება მოცემულობა, რომ 6 თვით არჩეული თავმჯდომარე და წევრები ინარჩუნებენ თანამდებობებს ორწელიწად-ნახევრის განმავლობაში. წარმოიდგინეთ, რომ 2024 წლის საპარლამენტო არჩევნებს ვხვდებით ისეთი თავმჯდომარით და ცესკოს წევრებით - ორ წევრზე და თავმჯდომარეზეა საუბარი - რომლებსაც, ორწელიწად-ნახევარია, გასული აქვთ უფლებამოსილების სტანდარტული 6-თვიანი ვადა. ამაზე რამხელა სპეკულაციები წამოვა, ხომ წარმოგიდგენიათ 2024 წლის საპარლამენტო არჩევნების შემდეგ?

ვინც აპროტესტებს ამ ახალ წესს, სინამდვილეში მათ ახალი ანომალია უნდათ: რომ ვერ ავირჩიოთ ახალი ცესკოს თავმჯდომარე და წევრები, რომ 2024 წლის ოქტომბერში გვყავდეს ისეთი თავმჯდომარე და ისეთი ორი წევრი, რომელსაც 6-თვიანი ვადა გასული აქვს. ამას არ დავუშვებთ, ანომალიას აღარ დავუშვებთ არც საარჩევნო კოდექსში და არც რაიმე სხვა კანონში“, - განაცხადა კობახიძემ.

წამყვანის შეკითხვაზე რამდენად იქნება ეს საკითხი პრობლემური კანდიდატის სტატუსის მინიჭების კუთხით, კობახიძემ განაცხადა, რომ ახალი წესი სწორედ ევროპულ სტანდარტებთან იქნება შესაბამისობაში, შესაბამისად, საარჩევნო კოდექსში შესატანი ცვლილებები 12 პუნქტთან წინააღმდეგობაში ვერ იქნება.

„დღევადნელი წესი არის სწორედ წინააღმდეგობაში ევროპულ საუკეთესო პრაქტიკასთან, ახალი წესი თავიდან ბოლომდე იქნება შესაბამისობაში ევროპულ საუკეთესო პრაქტიკასთან. აქედან გამომდინარე, საბაბი მაინც ხომ უნდა არსებობდეს? - ეს ახალი პროცედურა ვერავითარ შემთხვევაში ვერ იქნება წინააღმდეგობაში 12 პუნქტთან.“ - განმარტა ირაკლი კობახიძემ "საზოგადოებროვი მაუწყებლის" ეთერში.