2024 წელი: რით გაგვახარებს ხის მწვანე დრაკონი
აღმოსავლური ჰოროსკოპის მიხედვით, მომავალი - 2024 წელი იდუმალებით მოცული დრაკონის წელი იქნება, რომელიც ჩინელი ასტროლოგებისთვის პირველ რიგში, ძლევამოსილებას, ქარიზმატულობასა და კეთილშობილებას განასახიერებს.
ჩინეთში უძველესი დროიდან განსაკუთრებულ პატივს სცემდნენ დრაკონს, რადგან ცინის დინასტიის იმპერატორთა სიმბოლოდ ითვლებოდა და ტაძრებს, მდიდრულ სამოსს ამშვენებდა, დაბალი სოციალური ფენის წარმომადგენლებს კი, არა თუ დრაკონის გამოსახულებით ტანსაცმლის ტარების, არამედ „ღვთაებრივი არსების“ სიმბოლოს შეხების უფლებაც არ ჰქონდათ, განსაკუთრებით ურჩები კი, სიკვდილით ისჯებოდნენ.
მართალია, ნაკლებად სახარბიელო რეპუტაციის გამო ბევრი დრაკონს მხოლოდ უარყოფით თვისებებს მიაწერს და დარწმუნებულია, რომ 2024 წელიც სახიფათო, ნგრევისა და ზარალის მომტანი იქნება, მაგრამ აღმოსავლეთში დრაკონის წელი, რომელიც ცისა და მიწის ენერგიას გააერთიანებს, ერთ-ერთ ყველაზე იღბლიან და წარმატებულ პერიოდადაა მიჩნეული. მეტიც, მწვანე შეფერილობა, ისე, როგორც ხის სტიქია, დრაკონს მხოლოდ დადებითად ახასიათებს და ხაზს უსვამს მის კეთილგანწყობას.
როდის დადგება დრაკონის წელი აღმოსავლური კალენდრით
ტრადიციულად, ჩინეთი ახალ წელს შედარებით გვიან აღინიშნავს, ვიდრე დასავლური სამყარო, რადგან გრიგორიანულისგან განსხვავებით აღმოსავლური კალენდრით ახალი წელი ზამთრის მზის დაბნელების მეორე ახალმთვარეობას იწყება. 2024 წელს მზებუდობა, ანუ ყველაზე მოკლე დღე და გრძელი ღამე 22 დეკემბერს, ახალმთვარეობა კი - 10 თებერვალს ემთხვევა, ამიტომ სწორედ ამ დღეს დაიწყება ახალი წლის ათვლა, რომელიც 2025 წლის 28 იანვრამდე გაგრძელდება. ამასთანავე, ჩინელები არა 2024, არამედ 4721 წელს შეხვდებიან.
დრაკონი - 2024 წლის სიმბოლო
ჩინური კალენდრის თანახმად, ყოველი ახალი წელი ზოდიაქალური წრის ერთ-ერთ ცხოველთან ასოცირდება, რომელიც 12-თვიან პერიოდს მფარველობს და წყლის, მიწის, მეტალის, ცეცხლის ან ხის სტიქიას განასახიერებს. სხვათა შორის, მსგავსი კომბინაცია მხოლოდ 60 წელში ერთხელ მეორდება, ანუ 2024 წელი, რომელსაც ხის მწვანე დრაკონი მფარველობს, თამამად შეიძლება ჩაითვალოს 1964 და მომავალი 2084 წლების ანალოგად.
აღსანიშნავია, რომ ენერგიული და ძლევამოსილი დრაკონი აღმოსავლური ჰოროსკოპის ერთადერთი მითოლოგიური ცხოველია, რომელიც მეტწილად აქლემის თავით, ირმის რქებით და გველის კისრით, კობრის ქერცლით და არწივის ბრჭყალებით გამოისახება, თუმცა თანამედროვე სამყაროში მითიური დრაკონი აბსოლუტურად რეალურ იგუანასთან ან ვარანთან უფრო ასოცირდება და დიდი ხნის წინ გადაშენებული დინოზავრის პროტოტიპად ითვლება.
რას გვპირდება დრაკონის წელი
ასტროლოგების პროგნოზით, დრაკონის წელი მეტწილად სიკეთის მომტანი იქნება. დადებით ასპექტს ერთის მხრივ, მწვანე ფერის გავლენა გააძლიერებს, რომელიც განახლებას, ცვლილებებსა და აღორძინებას, სიმშვიდეს, მოქნილობასა და ნებისმიერ სიტუაციაში სწრაფად მორგების უნარს განასახიერებს, მეორეს მხრივ კი, ხის სტიქია, რომელიც ფიზიკურ და სულიერ ზრდას სიმბოლიზირებს, ამიტომ წარმატებას მხოლოდ საკუთარ თავში დარწმუნებული, შემოქმედებითი ადამიანები მიაღწევენ, რომელთაც მკაფიოდ ჩამოყალიბებული გეგმა ექნებათ და ზუსტად ეცოდინებათ რა უნდათ, არასერიოზულ და უპასუხისმგებლო, მოსაწყენ და უინტერესო ადამიანებს კი, ვისთანაც საერთოდ არ ღირს მომავალ წელს ურთიერთობა, მხოლოდ პრობლემები და იმედგაცრუება ელით.
2024 წელი, რომელიც საინტერესო და სასიამოვნო მოვლენებით იქნება გამორჩეული, თამამად შეიძლება ჩაითვალოს კარიერული წინსვლის, საბედისწერო შეხვედრების და დაუვიწყარი მოგზაურობების წელიწადად. თუმცა, მხოლოდ მას გაუმართლებს, ვინც პატივისცემას გამოიჩენს წლის მბრძანებლის მიმართ და ყველა მის მოთხოვნას შეასრულებს, რადგან ერთი შეხედვით მშვიდმა და გაწონასწორებულმა დრაკონმა გაბრაზება და შურისძიებაც მთელი გულით იცის.
მართალია, 2024 წელი ნაკიანი წელია, რაც ბევრისთვის ავისმომასწავებელ ნიშნად ითვლება, მაგრამ მედიდურ დრაკონს არც მსგავსი ცრურწმენები აშინებს და მზადაა ნებისმიერ სიტუაციაში გარისკოს.
როგორ შევხვდეთ დრაკონის წელს
საიმპერატორო შარავანდედით შემოსილი არსებაა, რომელსაც ძალიან უყვარს ყურადღების ცენტრში ყოფნა, დახვედრასაც განსაკუთრებულს ითხოვს. სასიკეთო იქნება დღესასწაულის მდიდრულ რესტორანში, კლუბში და შეძლებულ ნათესავებთან აღნიშვნა, მათ კი, ვისაც სახლში დარჩენა ურჩევნია, თუმცა არც დრაკონის კეთილგანწყობის დაკარგვა უნდა, აუცილებლად უნდა მორთოს ინტერიერი ტრადიციული აღმოსავლური სიმბოლოებით და ბრჭყვიალა აქსესუარებით, კაშკაშა ფერებით და გირლანდებით, არომატული სანთლებით და ნაქარგი ბალიშებით.
სადღესასწაულო წვეულება აუცილებლად მხიარული და ხმაურიანი უნდა იყოს. აქტიურად გაერთეთ, ბევრი იცეკვეთ, იმღერეთ და იმხიარულეთ, სტუმრებს კი, გემრიელი კერძებით გაუმასპინძლდით და მხოლოდ ძვირფასი საჩუქრები უსახსოვრეთ, რადგან დრაკონს ძალიან არ უყვარს რუტინა და ყოველდღიური ერთფეროვნება, მოწყენილი და ნაღვლიანი ადამიანები. არ დაიშუროთ ქათინაური, შეაქეთ და გამოუტყდეთ სიყვარულში ახლობლებს, რადგან რასაც გასცემთ, ზუსტად იმას დაგიბრუნებთ წლის მბრძანებელი.
ფუფუნების მოყვარულ დრაკონს, რომლის სისუსტე ძვირფასი, ბრჭყვიალა და თვალშისაცემი ნივთებია, მოლხენაც მეფურად უყვარს, ამიტომ აუცილებლად გაუმასპინძლდით „ცეცხლოვანი“ სუნელებით შეკმაზული თევზისა და ხორცის მრავალფეროვანი კერძებით, ცოცხალი სალათით და ეგზოტიკური ხილით, აზიური დესერტით და ძვირადღირებული შუშხუნა ღვინით.
რა თქმა უნდა, მდიდრულ მენიუს სერვირებაც შესაბამისი სჭირდება, ამიტომ გააფორმეთ სადღესასწაულო სუფრა მდიდრული ჭურჭლით და ხელსახოცებით, რომელთაც დრაკონის გამოსახულება დაამშვენებს, ცხოველის ფიგურა კი, აუცილებლად მაგიდის ცენტრში დააბრძანეთ. არ დაივიწყოთ არც ბონსაის ან დეკორატიული ხის შეძენა დიდი მწვანე ფოთლებით, რომელსაც წითელ ლენტს შემოახვევთ და წლის ბოლომდე გამოსაჩენ ადგილას დატოვებთ, პერიოდულად კი, „ძვირფასი ძღვენით“ - მონეტებითა ან ქაღალდის ფულით შეახსენებთ თავს.
დრაკონის პატივსაცემად მოწყობილ სადღესასწაულო წვეულებას ყველაზე მეტად წითელი და მწვანე, ვერცხლისფერი, ოქროსფერი და მოთეთრო-ნაცრისფერი, აბრეშუმის, ხავერდისა და ატლასის ელეგანტური სამოსი მოუხდება ძვირფასი აქსესუარებით - ოქროს ბროშებითა და საყურეებით, სამაჯურით და ყელსაბამით, რადგან რაც უფრო მეტად იბრწყინებთ ახალი წლის ღამეს, მით უფრო მეტ ბრწყინვალებას დაიბევებთ მთელი წლის განმავლობაში.
აღმოსავლური ჰოროსკოპის რომელ ნიშანს გაუმართლებს ყველაზე მეტად
მართალია, საერთო ჯამში ხის მწვანე დრაკონი მშვიდი და აუღელვებელი იქნება, მაგრამ ზოგიერთ ნიშანს სიხარულსა და წარმატებას მოუტანს, ზოგს კი, სირთულეებით გამოცდის.
ვირთხა - დრაკონი და ვირთხა დიდი ხანია მეგობრობენ, ამიტომ ჰოროსკოპის ეს ნიშანი საქმიანობის ყველა სფეროში წარმატებული იქნება.
ხარი - მრავალსაუკუნოვანი კონკურენცია ხარსა და დრაკონს შორის სწორედ 2024 წელს მიაღწევს პიკს, ამიტომ ხარს სერიოზულ ბრძოლაში მოუწევს ჩაბმა, რათა საკუთარი ადგილი მოიპოვოს მზის ქვეშ.
ვეფხვი - საუკეთესო საჩუქრად ვეფხვისთვის საიმედო მეგობრები და პარტნიორები გახდებიან, ვისთან ერთადაც გრანდიოზული წარმატების მიღწევას შეძლებს.
კურდღელი (კატა) - გარშემომყოფებთან საერთო ენის მოძიება და საქმეში წარმატება მხოლოდ კურდღლის მოქნილობასა და დათმობის უნარზე იქნება დამოკიდებული.
დრაკონი - რა თქმა უნდა, 2024 წლის ფავორიტი თავად დრაკონია, რომელსაც ყველაზე მეტად გაუმართლებს, რადგან მთელი წელი საინტერესო მოვლენებითა და ახალი ნაცნობობით იქნება დატვირთული.
გველი - დრაკონის მონათესავე გველს წარმატების მისაღწევად და ავტორიტეტის მოსაპოვებლად თანდაყოლილი სიბრძნისა და მოთმინების გამოჩენა მოუწევს.
ცხენი - ზოდიაქოს ამ ნიშანს ნაკლებად სწყალობს დრაკონი, ამიტომ უკეთესი იქნება თუ 2024 წელს ჩრდილში დარჩება და ნაკლებად იაქტიურებს.
ცხვარი (თხა) - წელი მხოლოდ იმ შემთხვევაში იქნება წარმატებული თუ ცხვარი მეტ მოკრძალებას, თავშეკავებას გამოიჩენს, უარს იტყვის კაპრიზებზე და სხვებივით იშრომებს.
მაიმუნი - მობილური და ენერგიული მაიმუნი ყოველთვის ახერხებს დრაკონის გახალისებას, ამიტომ მისი მფარველობითაც უპირობოდ სარგებლობს, თუმცა წელს მეტი გონიერების გამოჩენა და ჩვეულ გაქნილობაზე უარის თქმა მოუწევს, რათა კეთილგანწყობის ნაცვლად რისხვა არ დაიმსახუროს.
მამალი - დრაკონის „ბუმბულიანი ანალოგი“, რომელსაც ხშირად ადარებენ ხასიათის თავისებურებების გამო, სწორედ ამ უპირატესობით ისარგებლებს და მთელ წელს საკუთარ სურვილებს მოარგებს.
ძაღლი - მართალია, თავნება ძაღლი წლის დასაწყისში ძალიან გაჯიუტდება და არ მოინდომებს დრაკონის წესების მიღებას, მაგრამ მალე დაიხევს უკან და მორჩილად გააგრძელებს საქმის კეთებას.
ტახი (ღორი) - საკმაოდ ნაყოფიერი იქნება წელი ტახისთვის, მთავარია ზედმეტად არ გაიტაცოს საკუთარ თავზე ფიქრმა და ახლობლებზე ზრუნვისთვისაც გამონახოს დრო.
