რომელ ქუჩებზე გავრცელდება დიდ გაბარიტებიანი ავტომანქანების გადაადგილებაზე შეზღუდვა

თბილისის მერიის ინფორმაციით, დიდი გაბარიტების მქონე ავტომანქანების გადაადგილებაზე შეზღუდვების დარღვევისთვის ავტოსატრანსპორტო საშუალების მფლობელები 1000 ლარის ოდენობით დაჯარიმდებიან, ხოლო განმეორებით და ყოველ შემდგომ შემთხვევაზე - 3000 ლარით.

მერიის ცნობით, შეზღუდვა დაწესდა M3 (ავტობუსი, 5 ტონაზე მეტი), N2 (სატვირთო, 3.5-დან 12 ტონამდე) და N3 (სატვირთო, 12 ტონაზე მეტი) კატეგორიების სატრანსპორტო საშუალებებისთვის 08:00-11:00 და 17:00-20:00 საათების შუალედში.

აკრძალვა მოქმედებს მხოლოდ იმ მონაკვეთებში, სადაც პიკის საათებში ტრანსპორტის დიდი ნაკადებია. კერძოდ, ქეთევან დედოფლის გამზირზე, ნიკოლოზ ბარათაშვილის ხიდისა და იუსტიციის სახლის ტერიტორიაზე; წერეთლის გამზირზწ, ვაკე-საბურთალოს ცენტრალურ ქუჩებზე და ა.შ. დეტალური ინფორმაცია იხილეთ რუკაზე:

გარდა ამისა, ახალი რეგულაცია არ ვრცელდება შემდეგ სატრანსპორტო საშუალებებზე: საზოგადოებრივ ტრანსპორტზე; საავარიო, ასევე სიცოცხლისა და ჯანმრთელობისათვის საფრთხის შემცველი შემთხვევების აღმოსაფხვრელად საჭირო ტრანსპორტზე (სასწრაფო დახმარების, სამაშველო, სახანძრო, საევაკუაციო და ა.შ. ტრანსპორტი); მუნიციპალური ან სახელმწიფო ინფრასტრუქტურული პროექტების განხორციელებისთვის საჭირო ტრანსპორტზე; მოსწავლეებისა და სტუდენტების გადაადგილებისათვის საჭირო ტრანსპორტზე;

ტურისტული საქმიანობის განხორციელებისთვის საჭირო ტრანსპორტზე; ოპერატიულ-სამძებრო საქმიანობის განმახორციელებელ პირებზე; ბეტონმზიდ სატრანსპორტო საშუალებებზე; ნავთობპროდუქტების გადამზიდავ ტრანსპორტზე 08:00-11:00 საათების შუალედში; სადისტრიბუციო საქმიანობისთვის განკუთვნილ ტრანსპორტზე 08:00-11:00 საათების შუალედში. ამ კატეგორიისთვის გამონაკლისი მხოლოდ 2024 წლის პირველ სექტემბრამდე იმოქმედებს.

ცნობისთვის, 2024 წლის 1-ელი იანვრიდან, თბილისში დიდი გაბარიტების მქონე ავტომანქანების გადაადგილებაზე შეზღუდვები ამოქმედდა.

წყარო : bpn.ge