ევროპაში ტურისტებზე ბინების დღიურად გაქირავება შესაძლოა, გამკაცრდეს

ევროკავშირმა Airbnb-სა და ტურისტებისთვის საცხოვრებლის მოკლევადიანი იჯარით დაკავებულ სხვა კომპანიებს შესაძლოა, შეზღუდვები დაუწესოს.

როგორც Unian-ი Sky News-ზე დაყრდნობით წერს, ევროკომისიამ შეიმუშავა კანონპროექტი, რომელიც საცხოვრებელ სექტორში არსებული სიტუაციის შეფასების ერთიანი ევროპული სისტემის შექმნას ითვალისწინებს.

ამ გზით ევროპის ხელისუფლება იმედოვნებს, რომ ცენტრალიზებულად გადაჭრის ხელმისაწვდომი საცხოვრებლის დეფიციტის პრობლემას, რამაც მთელ ევროპაში უკვე გამოიწვია საპროტესტო აქციები.

სიტუაციის მოგვარების მცდელობისას, ზოგიერთი ქალაქის ხელისუფლებამ, მათ შორის პარიზმა, ბარსელონამ და ვენეციამ, ადრე დამოუკიდებლად დააწესეს ზომები Airbnb-ს საქმიანობის შეზღუდვისთვის, რამაც სასამართლო დავების სერია გამოიწვია.

ახლა კი შეზღუდვების დაწესება ევროკავშირის დონეზე ერთიანი მიდგომით იგეგმება, რაც განსაზღვრავს, განიცდის თუ არა კონკრეტული რაიონი დაძაბულობას საბინაო ბაზარზე. ამისთვის ხელისუფლება გააანალიზებს უძრავი ქონების ფასებისა და მოსახლეობის შემოსავლების დონის თანაფარდობას, ასევე დააკვირდება ბოლო ათწლეულის განმავლობაში მოთხოვნის ზრდის ტენდენციას.

დოკუმენტი ასევე მოუწოდებს ხელისუფლებებს, განსაკუთრებული ყურადღება დაუთმოს მოკლევადიანი იჯარის იმ სახეობებს, რომლებიც ყველაზე მეტად ახდენენ უარყოფით გავლენას გრძელვადიანი საცხოვრებლის ხელმისაწვდომობაზე.

ევროკომისიაში განაცხადეს, რომ მოკლევადიან იჯარასთან დაკავშირებული ნებისმიერი შემდგომი შეზღუდვა უნდა იყოს დასაბუთებული, ეხებოდეს მხოლოდ პრობლემურ რაიონებს და არ ჰქონდეს უკუქცევითი ძალა.

ამ სიახლეების ფონზე, 10 სექტემბრის დილის ვაჭრობისას Airbnb-ს აქციები დაახლოებით 3%-ით გაიაფდა.

თავად კომპანიაში კი განაცხადეს, რომ მთავარი პრობლემა საცხოვრებლის ნაკლებობაა.

"ეს ნიშნავს, რომ რეგულირება ფოკუსირებული უნდა იყოს იქ, სადაც დეფიციტი ნამდვილად არსებობს: მშენებლობაზე, რეკონსტრუქციასა და იმ საცხოვრებლების გამოყენებაზე, რომლებიც დღეს ცარიელია მთელ ევროპაში", - განაცხადა ევროკავშირში Airbnb-ს სახელმწიფო ორგანოებთან ურთიერთობის ხელმძღვანელმა ჯორჯ მაუროსიმ.

კანონპროექტი ძალაში მხოლოდ ევროკავშირის ქვეყნებისა და ევროპარლამენტის მიერ დამტკიცების შემდეგ შევა, რაც უახლოეს თვეებში უნდა მოხდეს.

თუ დოკუმენტს მიიღებენ, მომავალში ამან, შესაძლოა, ტურისტებისთვის შეთავაზებების შემცირება და, შესაბამისად, ფასების ზრდა გამოიწვიოს.

საბინაო პრობლემები ევროპაში როგორც UNIAN.Tourism-ი იუწყებოდა, ბოლო წლებში ტურისტებში პოპულარული ევროპის ისეთი ქვეყნები, როგორიცაა, მაგალითად, ესპანეთი, იტალია ან საბერძნეთი, საცხოვრებლის სერიოზული დეფიციტის პრობლემას აწყდებიან. ადგილობრივი მცხოვრებლები ყველაფერში ტურისტებს ადანაშაულებენ, რომლებიც მათ ხელმისაწვდომ საცხოვრებელს "ართმევენ": კარგი რაიონების აპარტამენტების მფლობელები ამჯობინებენ ბინები უფრო ძვირად დღიურად გააქირაონ მოგზაურებზე, ვიდრე უფრო იაფად მისცენ ადგილობრივებს გრძელვადიანი სარგებლობისთვის.

ამ ტალღაზე ზოგიერთმა ქვეყანამ მოკლევადიანი იჯარის პოპულარული პლატფორმებისთვის შეზღუდვების დაწესება დაიწყო. მაგალითად, ესპანეთში უკანონოდ ცნეს 120 ათასი განცხადება Airbnb-ზე და მათი წაშლის განკარგულება გასცეს. მოგვიანებით ადგილობრივმა ხელისუფლებამ სერვისი სხვადასხვა დარღვევისთვის 64 მილიონი ევროთი დააჯარიმა.

ამასობაში Airbnb-ში განაცხადეს, რომ ჭარბ ტურიზმზე მთელი პასუხისმგებლობის მხოლოდ მათზე გადაბრალება უსამართლოა, რადგან ევროპაში საცხოვრებლის დეფიციტის პრობლემა ბევრად უფრო ფართოა.