თხილამურებით სრიალის დროს ტურისტი დაიღუპა - სად მოხდა შემთხვევა?
საფრანგეთში, კურშაველში, სათხილამურო ტრასაზე მომხდარი შეჯახების შედეგად, ბრიტანელი ქალი დაიღუპა, კიდევ ერთი პირი კი მძიმედ დაშავდა. ინფორმაციას guardian-ი ავრცელებს.
დაღუპული 62 წლის ბრიტანეთის მოქალაქეა, რომელიც თხილამურებით სრიალის დროს 35 წლის მამაკაცს შეეჯახა და ტრავმული შოკის შედეგად გარდაიცვალა. მიუხედავად იმისა, რომ ადგილზე სათხილამურო პატრული და სასწრაფო დახმარების ექიმები დროულად მივიდნენ, ექიმებმა მისი რეანიმირება ვერ შეძლეს.
დაშავებულ 35 წლის მამაკაცს შეჯახების შედეგად ფეხი აქვს მოტეხილი, ის საავადმყოფოშია გადაყვანილი. გავრცელებული ინფორმაციით, მამაკაციც ბრიტანეთის მოქალაქეა.
შეჯახება "შავი ტრასების" სახელით ცნობილ ფერდობზე მოხდა, რომელიც ძალიან რთული სათხილამუროა ტრასაა. ის პროფესიონალი მოთხილამურეებისა და სნოუბორდისტებისთვის არის განკუთვნილი.
ადგილობრივი პოლიციის უფროსის განმარტებით, საქმეზე დაწყებულია გამოძიება, რათა შეჯახების გამომწვევი მიზეზები დაზუსტდეს.
