გზის ჯგუფურად ბლოკირების მცდელობაზე დაკავებულებს სასამართლომ გირაო შეუფარდა

„თბილისი მოლთან“ სტრატეგიული მნიშვნელობის მქონე ობიექტის ჯგუფურად ბლოკირების მცდელობაზე დაკავებულებს, გიგი უგულავას და კიდევ 7 პირს საპატიმრო გირაო სხვადასხვა ოდენობით შეეფარდა, რაც იმას ნიშნავს, რომ ისინი თანხის გადახდის შემდეგ გათავისუფლდებიან.

ბრალდებულების ნაწილს 3 500, ნაწილს კი 5 000-ლარიანი გირაო შეეფარდა. ისინი საპატიმროს გირაოს თანხის გადახდის შემდეგ დატოვებენ.

გადაწყვეტილება მოსამართლე დავით კურტანიძემ მიიღო. აღკვეთის ღონისძიების სახით გირაოს შეფარდების შუამდგომლობით მოსამართლეს პროკურატურამ მიმართა. 

გირაო შეეფარდათ: 

გიგი უგულავას;

ირაკლი წიგნაძეს;

ირაკლი ტაბატაძეს;

ნიკოლოზ კუტუბიძეს;

ვასილ ელიავას;

ნიკოლოზ ქუმსიშვილს;

ალექსანდრე გოგოლაძეს;

დიმიტრი ბიძინაშვილს.

ცნობისთვის, დაკავებულებს ბრალი სისხლის სამართლის კოდექსის 19-222-ე მუხლით წარედგინათ, რაც სტრატეგიული ან განსაკუთრებული მნიშვნელობის ობიექტის ჯგუფურად ბლოკირების მცდელობას გულისხმობს.

2 თებერვალს „თბილისი მოლთან" მიმდინარე საპროტესტო აქციაზე სამართალდამცავებმა ჯამში 31 პირი ადმინისტრაციული წესით დააკავეს, თუმცა, 4 თებერვალს 8 პირს, მათ შორის, ოპოზიციონერ პოლიტიკოს გიგი უგულავას, სისხლის სამართლის კოდექსით გადაუკვალიფიცირდა.

წარდგენილი ბრალდება 2-დან 4- წლამდე თავისუფლების აღკვეთას ითვალისწინებს.