დიდთოვლობის გამო, ფოთში 6 000-მდე აბონენტს ელექტროენერგია არ მიეწოდება - ბაღებში და სკოლებში სასწავლო პროცესი შეჩერდება

ფოთის მუნიციპალიტეტში თოვლის სახით მოსული უხვმა ნალექმა პრობლემები შექმნა. ავტომანქანებს გადაადგილება უჭირთ, გარკვეულ უბნებს არ მიეწოდება ელექტროენერგია. მერიის ინფორმაციით, ნალექისგან გზებისა და ტროტუარების გაწმენდა ინტენსიურად მიმდინარეობს, იყრება ტექნიკური მარილი.

მათივე ცნობით, ამ დროისთვის ელექტროენერგია არ მიეწოდება 6 000-მდე აბონენტს. აღდგენითი სამუშაოები უწყვეტ რეჟიმში გრძელდება და 17:00 საათისთვის სრულად აღდგება ელექტროენერგიის მიწოდება.

მოსალოდნელი უამინდობის გამო, 24 და 25 თებერვალს ფოთის საბავშვო ბაღებში სააღმზრდელო პროცესი დროებით შეჩერდება, ასევე მხოლოდ, 24 თებერვალს სასწავლო პროცესი შეჩერდება საჯარო სკოლებში.

მერიის ინფორმაციით, მუნიციპალური სამსახურები საგანგებო რეჟიმში აგრძელებენ მუშაობას.