რუსეთში იმპორტირებული მეორადი მანქანების 7.5% საქართველოზე მოდის - რუსული „ავტოსტატის“ კვლევა
მაშინ, როდესაც ოფიციალური სტატისტიკით საქართველოდან რუსეთში მსუბუქი ავტომობილების ექსპორტი ფაქტობრივად, განულებულია, [სანქციების გამო] სხვას ამბობს რუსული ანალიტიკური სააგენტო „ავტოსტატის“ მონაცემები. მათი კვლევით, მხოლოდ მიმდინარე წლის თებერვალში რუსეთში მეორადი ავტომობილების 7.5% საქართველოდან შევიდა, ხოლო ახლების შემთხვევაში წილი 0.8%-ს შეადგენდა. ამავე ორგანიზაციის კვლევით, იანვარში ძველ ავტომობილებში საქართველოს წილი 5.9%-ს იყო. რაოდენობრივად რომ ავიღოთ, მხოლოდ თებერვალში რუსეთში საქართველოდან 1 388 ერთეული მეორადი ავტომობილის იმპორტი განხორციელდა.
რამდენი ახალი და მეორადი ავტომობილი შედის რუსეთში საქართველოდან
რუსეთში ახალი ავტომობილების იმპორტიორ ქვეყნებს შორის საქართველო მეექვსე ადგილზეა. თებერვლის იმპორტში საქართველოს წილმა 0,8% შეადგინა, რაც მეხუთე ადგილზე მყოფი სამხრეთ კორეის წილის ანალოგიური მაჩვენებელია.
სტატისტიკას რუსული ანალიტიკური სააგენტო, „ავტოსტატი“ ავრცელებს, რომელიც მონაცემებს ყოველთვიურად აახლებს.
რაც შეეხება მეორად, ანუ ავტომობილებს გარბენით, ამ იმპორტში საქართველოს წილმა 7,5% შეადგინა და იმპორტიორ ქვეყნებს შორის მეოთხე ადგილზეა. ორჯერ და უფრო მეტი პროცენტული მაჩვენებლით ქვეყანა ბელარუსს უსწრებს.
თებერვალში რუსეთში ყველაზე მეტი ახალი ავტომობილი ჩინეთიდან შევიდა, რომლის წილმაც იმპორტში, თითქმის, 81% შეადგინა. მეორე ადგილზე ყირგიზეთია (6,6%), ხოლო სამეულს ბელარუსი ხურავს (5,2%).
რუსეთში ახალი ავტომობილების იმპორტიორი ქვეყნების სია ასეთია: (2025 წლის თებერვალი)
ჩინეთი - 80,9%
ყირგიზეთი - 6,6%
ბელარუსი - 5,2%
ყაზახეთი - 1,9%
სამხ.კორეა - 0,8%
საქართველო - 0,8%
თურქეთი - 0,7%
იაპონია - 0,7%
სხვები - 2,4%
მეორადი ავტომობილების სეგმენტში იაპონია ლიდერობს, რომლის წილმაც თებერვლის იმპორტში 53% შეადგინა. მეორეზე სამხ.კორეა (20,0%), მესამეზე კი ჩინეთია (9,6%).
რუსეთში მეორადი ავტომობილების იმპორტიორი ქვეყნების სია ასეთია: (2025 წლის თებერვალი)
იაპონია - 53,4%
სამხ.კორეა - 20,0%
ჩინეთი - 9,6%
საქართველო - 7,5%
ბელარუსი - 3,0%
გერმანია - 1,8%
აშშ - 0,8%
არაბეთის გაერთანებული საემიროები - 0,8%
სხვები - 3,1%
