აღმოჩენილია კოსმოსური ზარბაზნის „ჭურვი“ - რას ამბობენ ასტრონომები?

ასტრონომებმა კოსმოსური ზარბაზნის „ჭურვი“ აღმოაჩინეს.

ჩვენგან 730 სინათლის წლის მანძილზე მდებარე ვარსკვლავის გარშემო მოძრაობს იუპიტერის ზომის ეგზოპლანეტა, რომელსაც იმხელა სიმკვრივე აქვს, შეიძლება წარმოდგენაც კი გაგიჭირდეთ. როგორც ასტრონომებმა განსაზღვრეს, ამ პლანეტის, სახელად TOI-4603b-ის მასა იუპიტერისას დაახლოებით 13-ჯერ აჭარბებს.

ეს იმას ნიშნავს, რომ ის დედამიწაზე სამჯერ მკვრივია, იუპიტერზე კი ცხრაჯერ. თავის ვარსკვლავს გარს უვლის სულ რაღაც 7,25 დღეში ერთხელ.

შედეგად, ის თავსდება პლანეტათა იმ მცირერიცხოვან, მაგრამ მნიშვნელოვან კატეგორიაში, რომლებიც თავდაყირა აყენებენ ჩვენს წარმოდგენას პლანეტების წარმოქმნისა და ევოლუციის შესახებ.

„ის ერთ-ერთი ყველაზე მასიური და მკვრივი ტრანზიტული გიგანტი პლანეტაა ჩვენთვის ცნობილთა შორის“, — წერს ინდოეთის ფიზიკის კვლევების ლაბორატორიის ასტრონომთა ჯგუფი, რომელსაც აკანკშა ხანდელვალი ხელმძღვანელობდა.

თეორიულად არსებობს ზღვარი, რა მასა შეიძლება ჰქონდეს პლანეტას. იმიტომ, რომ გარკვეულ კრიტიკულ ზღვარს ზემოთ, ბირთვში ტემპერატურა და წნევა საკმარისია ბირთვული სინთეზის დასაწყებად — პროცესის, რომლის დროსაც, ატომები ერთმანეთს ებმიან და მძიმე ელემენტებს წარმოქმნიან.