ისრაელის ჯანდაცვის სამინისტროს ცნობით, ქვეყანაში დაჭრილთა რიცხვი 2 382-მდე გაიზარდა

ისრაელის ჯანდაცვის სამინისტროში აცხადებენ, რომ ამ დილის მდგომარეობით, დაშავებულია, სულ მცირე, 2 382 ადამიანი

როგორც ადგილობრივი მედია იუწყება, დაშავებულთაგან 22 მძიმე მდგომარეობაშია, 345 კი მძიმედ დაშავებულია.

ბოლო მონაცემებით, თავდასხმის შედეგად ისრაელში 700-ზე მეტი  ადამიანი დაიღუპა.

ცნობისთვის, 7 ოქტომბრის დილიდან პალესტინურმა დაჯგუფება „ჰამასმა“, რომელიც ღაზის სექტორს აკონტროლებს, ისრაელის ტერიტორიებზე მასიური სარაკეტო იერიში წამოიწყო. „ჰამასის“ რაზმები ღაზას სექტორიდან გადავიდნენ მოსაზღვრე რაიონებში ისრაელში და რამდენიმე დასახლებული პუნქტი, მათ შორის, ისრაელის სამხედრო ბაზა დაიკავეს. „ჰამასმა“ ისრაელს 2000-მდე რაკეტა ესროლა.

„ჰამასის“ მებრძოლებმა ათობით ადამიანი დაატყვევეს, მათ შორის ისრაელის სამხედროები.

მალევე ისრაელში საომარი მდგომარეობა ოფიციალურად გამოცხადდა. „ისრაელი ომშია“ - განაცხადა ისრაელის სახელმწიფოს პრემიერ-მინისტრმა ბენიამინ ნეთანიაჰუმ.

ისრაელის პრემიერ-მინისტრმა მოსახლეობას მიმართა და პირობა დადო, რომ ისრაელის შეიარაღებული ძალები „მთელ ძალას“ გამოიყენებს „ჰამასის“ შესაძლებლობების გასანადგურებლად.