ბილ გეიტსის თქმით, ხელოვნური ინტელექტის გამოყენებით კვირის სამუშაო დღეები 5-დან 3-მდე შემცირდება

Microsoft-ის დამფუძნებელი ბილ გეიტსი მოელის, რომ 3-დღიანი სამუშაო კვირა ხელოვნური ინტელექტის წყალობით გახდება შესაძლებელი.

დღეს ბევრს ეშინია, რომ მანქანები ადამიანებს სამუშაოებს წაართმევენ და ბევრი უბრალოდ უმუშევარი დარჩება. თუმცა, გეიტსი ამას უარყოფითად არ უყურებს და მიაჩნია, რომ ხელოვნური ინტელექტი ჩვენ რუტინულ საქმეებში ჩაგვანაცვლებს და ზედმეტი შრომა აღარ დაგვჭირდება.

"თუ საბოლოოდ მიიღებთ საზოგადოებას, რომელშიც კვირის სამუშაო დღეების რაოდენობა სამია, ეს ძალიან კარგი იქნება. ეს საზოგადოებაზე დადებითად იმოქმედებს, გამოჩნდება მეტი თავისუფალი დრო, რასაც საინტერესო და შემეცნებით საქმიანობებს მივუძღვნით. მეტიც, თუ დაფიქრდებით, ცხოვრების მიზანი მხოლოდ სამუშაოს შესრულება არ არის", — თქვა გეიტსმა.

ბილ გეიტსი არ არის პირველი ტექ ლიდერი, რომელსაც მიაჩნია, რომ ადამიანებს ხუთდღიანი სამუშაო კვირის ჩანაცვლება შეეძლებათ.

JPMorgan-ის აღმასრულებელმა დირექტორმა, ჯეიმი დაიმონმა ცოტა ხნის წინ განაცახადა, რომ მშრომელების მომდევნო თაობას მხოლოდ 3,5-დღიანი სამუშაო კვირა ექნება.

იგივეს ფიქრობს ილონ მასკიც.

"შეგეძლება გქონდეს სამსახური, თუ ეს გენდომება. თუმცა, მომავალში ხელოვნური ინტელექტი თითქმის ყველაფერს შეძლებს", — თქვა მასკმა ხელოვნური ინტელექტის უსაფრთხოების სამიტზე.