სალეხ ალ-არურის მკვლელობა ისრაელის შემზარავი აგრესიის შედეგია - „ჰეზბოლას“ ლიდერი

რადიკალური შიიტური დაჯგუფება „ჰეზბოლას“ ლიდერმა, ჰასან ნასრალამ განაცხადა, რომ „ჰამასის“ მაღალჩინოსნის, სალეხ ალ-არურის მკვლელობა ისრაელის შემზარავი აგრესიის შედეგია.

ჰასან ნასრალას თქმით, ღაზაზე ისრაელის თავდასხმების რეალური მიზანი ყველა პალესტინელის ტერიტორიიდან გაძევებაა.

"ჩვენ დავინახეთ დიდი საფრთხე, მაგრამ ამავე დროს ჩვენ დავინახეთ წინააღმდეგობა", - აღნიშნა რადიკალური შიიტური დაჯგუფება „ჰეზბოლას“ ლიდერმა.

ნასრალამ ისრაელი დაადანაშაულა ღაზაში პალესტინელების წინააღმდეგ "გენოციდის ყველაზე დიდი ომის წარმოებაში".

მან ასევე აღნიშნა, რომ "სწორედ ამერიკელები აფერხებენ ომის დასრულებას ღაზაში".

"რაც მოხდა 7 ოქტომბრის შემდეგ და რაც მომავალში მოხდება, ამან დაასუსტა ისრაელი. ჩვენ არ გვეშინია ომის", - დასძინა მან.

2 იანვარს, ლიბანის დედაქალაქ ბეირუთის ერთ-ერთ უბანში ისრაელის სავარაუდო დარტყმის შედეგად, ტერორისტული ორგანიზაცია „ჰამასის“ მაღალჩინოსანი, სალეხ ალ-არური დაიღუპა. სალეხ ალ-არური „ჰამასის“ სამხედრო ფრთის დამფუძნებელი, პოლიტიკური ბიუროს თავმჯდომარის მოადგილე და დასავლეთ სანაპიროზე ტერორისტული დაჯგუფების სამხედრო მეთაური იყო.