ცნობილია იმ პირთა კატეგორია, ვისაც საპენსიო დანამატი გაეზარდა

ჩერნობილის ბირთვულ ობიექტზე კატასტროფის დროს დაზარალებულებისა და გარდაცვლილთა ოჯახის წევრების საპენსიო შემწეობა გაიზარდა, - ამის შესახებ „სოციალური შეღავათების მონეტიზაციის შესახებ“ საქართველოს მთავრობის 2024 წლის 15 იანვრის დადგენილებაშია აღნიშნული.

აღნიშნული კატეგორიის პირებისთვის პენსია 7 ლარს შეადგენდა. დადგენილების თანახმად კი, 40 ლარამდე გაზრდილ პენსიას შემდეგი კატეგორიის პირები მიიღებენ:

ჩერნობილში ბირთვულ ობიექტებზე ავარიული სიტუაციების შედეგების ლიკვიდაციაში მონაწილეობის გამო შეზღუდული შესაძლებლობის მქონე პირები;

ჩერნობილში ბირთვულ ობიექტებზე ავარიული სიტუაციების შედეგების ლიკვიდაციის მონაწილეები;

ჩერნობილის ატომურ ელექტროსადგურზე ავარიის შედეგად მარჩენლის დაკარგვისათვის პენსიის მიმღები ოჯახები;

პოლიტიკური რეპრესიების მსხვერპლად აღიარებული პირები და მათი ოჯახების შრომისუუნარო წევრები.

გარდა ამისა, საპენსიო შემწეობა გაიზარდა 1989 წლის 9 აპრილის დროს დაზარალებულთა და გარდაცვლილთა ოჯახებისთვის. ცვლილებამდე პენსია 22-დან 44 ლარამდე მერყეობდა. 15 იანვრის დადგენილებით კი განისაზღვრა შემდეგი:

თბილისში 1989 წლის 9 აპრილს საქართველოს დამოუკიდებლობის მოთხოვნით გამართული მშვიდობიანი აქციის დარბევის შედეგად შეზღუდული შესაძლებლობის მქონე პირები - 80 ლარს მიიღებენ ყოველთვიურად;

თბილისში 1989 წლის 9 აპრილს საქართველოს დამოუკიდებლობის მოთხოვნით გამართული მშვიდობიანი აქციის დარბევის შედეგად დაღუპულთა შრომისუუნარო მშობლებს, შრომისუუნარო მეუღლეს, რომელიც აღარ დაქორწინებულა, არასრულწლოვან შვილს ან/და ნაშვილებს – დახმარების სახით განესაზღვრათ ყოველთვიურად 80 ლარი;

თბილისში 1989 წლის 9 აპრილს საქართველოს დამოუკიდებლობის მოთხოვნით გამართული მშვიდობიანი აქციის დარბევის დროს დაზარალებულ პირებს – ყოველთვიურად განესაზღვრათ 60 ლარი.

წყარო - primetime.ge