ლაზარე გრიგორიადისის დედის პირველი კომენტარი, მას შემდეგ, რაც სასამართლომ მის შვილს 9 წლიანი პატიმრობა მიუსაჯა (ვიდეო)

ჩვენ მოლოდინი გვქონდა, რომ ეს განაჩენი დადგებოდა - ასეთი კომენტარი გააკეთა გასული წლის მარტის აქციების დროს დაკავებული, 21 წლის ლაზარე გრიგორიადისის დედამ, თამთა კალანდაძემ საქალაქო სასამართლოში, სადაც ლაზარე გრიგორიადისის განაჩენი რამდენიმე წუთის წინ გამოცხადდა.

როგორც მან აღნიშნა, ოჯახი ახლა პრეზიდენტის ადმინისტრაციასთან მისვლას გეგმავს.

„ჩვენ მოლოდინი გვქონდა, რომ ეს განაჩენი დადგებოდა. მის ნამუსზე იყოს ის, რაც გააკეთა და წინ დახვდეს ყველა ის კეთილი საქმე, რაც გაუკეთებია ჩვენს მოსამართლეს. აქედან მივდივართ პრეზიდენტის ადმინისტრაციასთან. მერე შევთანხმდებით და მივმართავთ ყველა ინსტანციას!“ - განაცხადა თამთა კალანდაძემ.

ცნობისთვის, მარტის აქციებზე პოლიციელების ჯანმრთელობის ხელყოფისა და სახელმწიფო ქონების განადგურების ბრალდებით დაკავებული 21 წლის ლაზარე გრიგორიადისი სასამართლომ დამნაშავედ ცნო. თბილისის საქალაქო სასამართლოს მოსამართლის, ზვიად შარაძის გადაწყვეტილებით, ლაზარე გრიგორიადისს თავისუფლების 9 წლით აღკვეთა მიესაჯა.