ბირჟაზე ნავთობის ფასი ეცემა

საერთაშორისო ენერგეტიკულ ბირჟაზე ნავთობის ფასი ეცემა. ერთ თვეში საქონლის ღირებულება 5.6%-ით შემცირდა და ამჟამად ბარელი Brent-ის ფასი 82.5 დოლარს შეადგენს, ამერიკული WTI-ს ფასი კი 78 დოლარის ფარგლებში მერყეობს. ერთთვიან პერიოდში ნავთობი ბირჟაზე საშუალოდ 6%-ითაა გაიაფებული.

რაც შეეხება რუსულ ნავთობს, ბარელი Urals-ის ფასი 67 დოლარის ფარგლებში მერყეობს, რაც ერთ თვეში დაახლოებით 15%-ით შემცირებული მაჩვენებელია.

Citigroup-ის პროგნოზით, მიმდინარე წლის მესამე კვარტალში ბარელი Brent-ის ფასი 70-დოლარიან ნიშნულამდე შემცირდება, რაც აშშ-ის მხრიდან წარმოების ზრდით და ბაზრის გაჯერებით იქნება განპირობებული. რა თქმა უნდა, ექსპერტები არ გამორიცხავენ OPEC-ის მხრიდან ინტერვენციის ალბათობას, თუმცა ამ სცენარს ნაკლებად მოსალოდნელად მიიჩნევენ, რადგან თავად OPEC-ის წევრ სახელმწიფოთა უმეტესობას ნავთობის მიწოდების შემცირება აღარ შეუძლია, რადგან მიწოდების დამატებით შეზღუდვა მათ საბიუჯეტო შემოსავლებს კრიტიკულად შეამცირებს, ბაზარზე არსებულ მოთხოვნას კი სხვა სახელმწიფოები დააკმაყოფილებენ.