კესარია აბრამიძის მკვლელობისთვის დაკავებულ ბექა ჯაიანს ბრალს დღეს ოფიციალურად წარუდგენენ

კესარია აბრამიძის მკვლელობისთვის დაკავებულ ბექა ჯაიანს ბრალს დღეს ოფიციალურად წარუდგენენ, რის შემდეგაც სასამართლო აღკვეთის ღონისძიებაზე იმსჯელებს.

26 წლის მამაკაცი, ქუთაისის საერთაშორისო აეროპორტთან, მკვლელობიდან მალევე აიყვანეს, ის ქვეყნის დატოვებას ცდილობდა.

ამოღებულია სათვალთვალო კამერებით გადაღებული კადრებიც, რომლებშიც ჩანს, როგორ შედის და შემდეგ როგორ გარბის შემთხვევის ადგილიდან ბექა ჯაიანი. ვიდეომასალით ირკვევა, რომ დანაშაული ზუსტად 14 წუთშია მომხდარი.

არსებული ინფორმაციით, დაკავებულ მამაკაცს ტრანსგენდერ ქალთან ურთიერთობა დიდი ხნის განმავლობაში ჰქონდა.

მოდელი და მსახიობი კესარია აბრამიძე, საკუთარ სახლში, მოკლული 2 დღის წინ მეზობლებმა ნახეს. მას, ცივი იარაღით, 20-მდე ჭრილობა ჰქონდა მიყენებული.

ბექა ჯაიანის წინააღმდეგ საქმე აღძრულია გენდერის ნიშნით განსაკუთრებული სისასტიკით დამამძიმებელ გარემოებაში ჩადენილი განზრახ მკვლელობისთვის. ბრალდებულს 16-დან 20 წლამდე ან უვადო პატიმრობა ემუქრება.