ლარის კურსი დასტაბილურდება და ეკონომიკაც დასტაბილურდება - ირაკლი კობახიძე

პრემიერ-მინისტრი ირაკლი კობახიძე ამბობს, რომ "მცირე რყევები" დროებითია და ლარის კურსი დასტაბილურდება. მან ამის შესახებ ბრიფინგზე განაცხადა.

ამასთან, კობახიძემ ეკონომიკურ ზრდაზე ისაუბრა და თქვა, რომ წელს შარშანდელზე ბევრად უფრო მაღალი მაჩვენებელი იქნება.

"ეკონომიკური ზრდა სწრაფი ტემპით გრძელდება. ოქტომბრის თვე დასრულდა 11%-იანი ეკონომიკური ზრდით. შესაბამისად, 10 თვის საშუალო ზრდამ შეადგინა 10%, ორნიშნა ეკონომიკური ზრდა გვაქვს წელს. ეს არის შარშანდელზე მაღალი მაჩვენებელი. რა თქმა უნდა, ეს პროცესი გაგრძელდება.

ასეთ რამდენიმედღიან ძალადობას შეუძლია რა თქმა უნდა მცირე რყევები გამოიწვიოს, მაგრამ ეს არის აბსოლუტურად დროებითი. ლარი დასტაბილურდება, როგორც ეს მოხდა წინა რყევების შემთხვევაში, რამდენიმე დღით შეიცვალა ლარის კურსი, თუმცა შემდეგ დაუბრუნდა პირვანდელ ნიშნულს. აქაც იგივე იქნება, ლარის კურსი დასტაბილურდება და ეკონომიკაც დასტაბილურდება. წლის ბოლოსთვის, მე ვფიქრობ, გავალთ მინიმუმ 9.5%-ზე ეკონომიკური ზრდის კუთხით",- განაცხადა კობახიძემ.

ცნობისთვის, 2 დეკემბრის ვაჭრობის შედეგად ლარი მკვეთრად, დოლართან 7 თეთრით, ხოლო ევროსთან 6 თეთრით გაუფასურდა. 3 დეკემბერს კი ლარი დოლართან და ევროსთან 3-3 თეთრით გაუფასურდა.