“გამაოგნებელი და წარმოუდგენელი” - საქართველო უგემრიელესი საკვების მქონე ქვეყნების ლიდერად დაასახელეს

სოციალური ქსელისა და ფორუმის კონტენტის მქონე პოპულარულ ვებგვერდ Reddit-ის მომხმარებლებმა საქართველო უგემრიელესი საკვების მქონე ქვეყნების ლიდერად დაასახელეს, რასაც The Daily Mail ავრცელებს.

კერძოდ, ყველაზე გემრიელი ქვეყნების ტოპ ხუთეულში საქართველო, ისლადნია, ირლანდია, ინდონეზია და მალაიზიაა.

Reddit-ის მომხმარებლები, რომლებიც საქართველოს სტუმრობდნენ, ადგილობრივ კერძებს “გამაოგნებელსა და წარმოუდგენელს” უწოდებენ. ადგილობრივმა სამზარეულომ მათ მოლოდინს გადააჭარბა, ზოგიერთი ტურისტი კი ისე დარჩა გაოცებული, რომ შინ დაბრუნებულმა ქართული კერძების მომზადება დაიწყო.

“ქვეყანაში რომ ჩავედით, ზოგადად, სამზარეულოს შესახებ, თითქმის, არაფერი ვიცოდით და ისე გაოცებული დავბრუნდით, რომ სახლში ქართული კერძების მომზადება დავიწყეთ,” - წერს მომხმარებელი.

საინტერესო “კულინარიული შემოქმედების” გარდა, ზოგიერთი მოგზაური თვით ინგრედიენტების ხარისხითა და გემოთი დარჩა გაოცებული.

“უბრალო პური, ყველი და ღვინოც კი უმაღლესი ხარისხისაა. შეიძლება ითქვას, რომ ისეთ ადგილას იმყოფებით, სადაც ხალხი კვებაზე ნამდვილად ზრუნავს,” - წერს ერთ-ერთი ტურისტი.

ამასთან, კონკრეტულ კერძებს შორის, რომლებმაც დიდი შთაბეჭდილება დატოვეს, განსაკუთრებით, ხაჭაპური და საცივი მოიხსენიება, რომლის “აუცილებლად გასინჯვასაც” საქართველოში ვიზიტით მყოფი ექსპერტები მომხმარებლებს ურჩევენ.

წყარო: ბიზნესპრესნიუსი