როგორია კავკასიის რეგიონის ეკონომიკური მდგომარეობა?

მიმდინარე წელს კავკასიის რეგიონი ეკონომიკური ზრდის მაღალი დინამიკით, მკაცრი მონეტარული პოლიტიკით, შედარებით მაღალი ინფლაციით და სავალუტო მერყეობით ხასიათდება. უშუალოდ ქვეყნების მიხედვით კი ვითარება ასეთია:

თურქეთი

თურქეთში წლიური ინფლაციის დონე აგვისტოში 32.6% იყო, მაშინ როცა ცენტრალური ბანკი რეფინანსირების განაკვეთს 43%-ის დონეზე ინარჩუნებს. მიუხედავად მკაცრი მონეტარული პოლიტიკისა, ლირა დოლართან მიმართებით კვლავ მნიშვნელოვნად გაუფასურებულია და ერთი დოლარის კურსი 41 ლირას აღწევს.

საერთაშორისო სავალუტო ფონდის (IMF) პროგნოზით, 2025 წელს თურქეთის ეკონომიკა დაახლოებით 3%-ით გაიზრდება. Reuters-ის პროგნოზის მიხედვით, წლის მთლიან მაჩვენებელს 2.9% მიაღწევს.

აზერბაიჯანი

აზერბაიჯანში ინფლაციის დონე საშუალოდ 5.7%-ია, რაც ცენტრალური ბანკის მიზნობრივ ზონაშია. IMF-ის პროგნოზით, 2025 წელს ქვეყნის ეკონომიკა 3.5%-ით გაიზრდება. ექსპერტების მიერ აზერბაიჯანის მაკროეკონომიკური გარემო რეგიონში შედარებით სტაბილურად მიიჩნევა.

სომხეთი

რაც შეეხება სომხეთს, მას ეკონომიკური ზრდის მიმართულებით რეგიონში ერთ-ერთი საუკეთესო შედეგი აქვს. IMF-ის პროგნოზით, წელს სომხეთის მთლიანი შიდა პროდუქტის მოცულობა დამატებით 4.5%-ით გაიზრდება.

რეფინანსირების განაკვეთი სომხეთში 6.75%-ს შეადგენს, წლიური ინფლაციის დონე კი ამჟამად 4%-ის ფარგლებშია.

რუსეთი

რუსეთის ეკონომიკური ზრდის პროგნოზი 2025 წლისთვის მნიშვნელოვნად შემცირდა. IMF-ის შეფასებით, ის მხოლოდ 0.9% იქნება, მაშინ როცა წინა პროგნოზით 1.5%-ს აღემატებოდა.

ინფლაციის დონე ოფიციალური მონაცემებით 9–10% ფარგლებშია, ხოლო რუსეთის ცენტრალური ბანკის რეფინანსირების განაკვეთი 18%-ის ფარგლებში მერყეობს. მიუხედავად მაღალი პროცენტული განაკვეთისა, ინფლაციის შეკავება კვლავ მნიშვნელოვან გამოწვევად რჩება და თან ამას უმუშევრობის ზრდა და ენერგეტიკული სექტორის კრიზისი ემატება.

საქართველო

საქართველოში 2025 წლისთვის IMF ეკონომიკური ზრდის პროგნოზს 6%-ზე განსაზღვრავს. ინფლაცია საშუალოდ 4.3%-ის ფარგლებშია, რაც მიზნობრივ მაჩვენებელთან ახლოსაა.

ეროვნული ბანკის მონეტარული პოლიტიკა კვლავ მკაცრია, რეფინანსირების განაკვეთი 8%-ის დონეზე რჩება. ეროვნული ვალუტა შედარებით სტაბილურია, დოლარის კურსი კი საშუალოდ 2.70 ლარის ფარგლებშია.